Qazaqstan men BAÁ arasynda júrgizýshi kýálikterin ózara taný týraly kelisim kúshine endi
ASTANA. KAZINFORM — 25 shildeden bastap Qazaqstan Respýblıkasy men Birikken Arab Ámirlikteri arasynda júrgizýshi kýálikterin ózara taný jáne aıyrbastaý týraly kelisim kúshine enedi.
Qujatqa Qazaqstan Respýblıkasy Іshki ister mınıstri Erjan Sádenovtiń Birikken Arab Ámirlikterine jumys sapary barysynda qol qoıyldy.
Jańa kelisim eki el azamattary úshin qosymsha múmkindikter ashyp, ulttyq júrgizýshi kýálikterin paıdalaný jáne aıyrbastaý rásimin edáýir jeńildetedi.
Endi Birikken Arab Ámirlikterinde ýaqytsha bolatyn Qazaqstan azamattary Ámirlikterdiń zańnamasyna sáıkes qazaqstandyq júrgizýshi kýáligin paıdalana alady. Al turaqty turýǵa kóshken jaǵdaıda «B» sanaty (jeńil avtomobılder) jáne «B1» kishi sanaty (úsh dóńgelekti kólik quraldary men kvadrotsıklder) boıynsha teorııalyq jáne praktıkalyq emtıhandardy tapsyrmaı-aq júrgizýshi kýáligin aıyrbastaı alady.
Dál osyndaı tártip Qazaqstanǵa turaqty turýǵa kóshken Birikken Arab Ámirlikteri azamattaryna da qoldanylady.
Júrgizýshi kýáligin aıyrbastaý úshin jaramdy ulttyq júrgizýshi kýáligi, qoldanystaǵy turýǵa yqtııarhat, qujattyń resmı aýdarmasy (BAÁ-de – arab tiline, Qazaqstanda – qazaq nemese orys tiline), sondaı-aq mindetti medıtsınalyq tekserýden ótkeni týraly qujat qajet.
Bul rette ulttyq júrgizýshi kýáligi tárkilenbeıdi. Aıyrbastaý rásimi aıaqtalǵannan keıin eki memlekettiń quzyretti organdary bir-birin júrgizilgen rásim týraly ǵana habardar etedi.
Jeńildetilgen tártip tek «B» sanaty men «B1» kishi sanatyna ǵana qoldanylady. Ózge sanattar boıynsha júrgizýshi kýálikterin aıyrbastaý qabyldaýshy memlekettiń zańnamasyna sáıkes júzege asyrylady.
Atalǵan kelisimniń kúshine enýi Qazaqstan Respýblıkasy men Birikken Arab Ámirlikteri arasyndaǵy yntymaqtastyqty damytýdaǵy kezekti mańyzdy qadam bolyp tabylady jáne eki el azamattary úshin ákimshilik rásimderdi anaǵurlym jeńil ári qoljetimdi etedi.
Іshki ister mınıstrligi Qazaqstan azamattaryn shetelde júrgen kezde barǵan eldiń zańnamasyn qatań saqtaýǵa, onyń dástúrlerin, qoǵamdyq tártip qaǵıdalaryn jáne mádenıetin qurmetteýge shaqyrady. Árbir azamat shetelde ózin ǵana emes, óz memleketin de tanytady. Zańǵa baǵyný jáne ózgelerge qurmetpen qaraý – Qazaqstannyń oń halyqaralyq ımıdjin qalyptastyrýdyń mańyzdy quramdas bóligi.
Іshki ister mınıstrligi «Zań jáne Tártip» qaǵıdatyn iske asyrý aıasynda jol qozǵalysy tártibin nyǵaıtý, jaýapty minez-qulyq mádenıetin qalyptastyrý jáne zańǵa degen qurmetti elimizde de, onyń sheginen tys jerlerde de arttyrý baǵytyndaǵy jumystardy jalǵastyrady.
Aıta ketelik jyl basynan elimizde qansha adam júrgizýshi kýáliginen aıyryldy jáne oǵan ne sebep bolǵany týraly jazǵan edik.
