Qazaqstan men BAÁ arasynda qandaı kelisimderge qol qoıylmaq
ASTANA. KAZINFORM - Tsıfrlyq damý, ınnovatsııalar jáne aeroǵarysh ónerkásibi mınıstr Jaslan Mádıev Abý-Dabıdiń Taq murageriniń elimizge sapary aıasynda Qazaqstan men BAÁ arasynda qandaı kelisimderge qol qoıylatynyn aıtty.
- Búgin birneshe kelisimge qol qoıamyz. Birinshisi – Qazaqstanda sýperkompter klastaryn salý. Bul NVIDIA chıpteri bazasyndaǵy óńirdegi birinshi úlken sýperkompter bolmaq. Atalǵan sýperkompıýter jasandy ıntellekt modelderin jattyqtyryp, startaptar úshin de paıdaly bola alady. Óıtkeni, olardyń ónimderi jasandy ıntellekt nemese jasandy ıntellekt salasyndaǵy startaptar bazasy negizinde ázirlengen. Sonymen qatar ýnıversıtetter ózderiniń zertteý jumystaryna da paıdalanady, - dedi ol Aqordada BAQ ókilderiniń saýalyna oraı.
Onyń atap ótýinshe, ekinshi kelisim Smart City Astana jobalaryn qoldaý úshin elordada Derekterdi óńdeý ortalyǵyn salýdy kózdeıdi. Ortalyq qurylysy bıyl bastalmaq.
- Úshinshi baǵyt – bıyl Alem.ai Halyqaralyq jasandy ıntellekt ortalyǵynda Sıtýatsııalyq ortalyqty iske qosý. Onda bıznes, memleket jáne ǵylym kollaboratsııasy júzege asyrylady, - degen mınıstr rásimdeletin kelisimder somasy 250 mln dollarǵa jýyqtaıtynyn atap ótti.
Memleket basshysy Qasym-Jomart Toqaev Aqordada Qazaqstanǵa resmı saparmen kelgen Abý-Dabıdiń Taq murageri sheıh Haled ben Muhammed ben Zaıd Ál-Nahaıandy qarsy alǵanyn jazǵan edik.