Qazaqstan men BAÁ arasynda aýyl sharýashylyǵy men mashına jasaýda yntymaqtastyq kúsheıedi
ASTANA. KAZINFORM – Búgin Senattyń jalpy otyrysynda «Bir taraptan Eýrazııalyq ekonomıkalyq odaq pen oǵan múshe memleketter jáne ekinshi taraptan Birikken Arab Ámirlikteri arasyndaǵy ekonomıkalyq áriptestik týraly kelisimdi ratıfıkatsııalaý týraly» Zań maquldandy.
Kelisimge 2025 jylǵy 27 maýsymda Mınsk qalasynda Eýrazııalyq ekonomıkalyq odaq elderi men Birikken Arab Ámirlikteri arasyndaǵy taýar saýdasyn odan ary keńeıtý jáne ońaılatý maqsatynda qol qoıyldy.
- Kelisimniń negizgi ereksheligi - taýar nomenklatýrasynyń 85%-dan astamyna qatysty ımporttyq kedendik bajdardy joıý. Importtyq kedendik bajdardyń kúshin joıýdan basqa, taýarlardyń shyǵarylǵan elin anyqtaý, kedendik yntymaqtastyq, ishki naryqty qorǵaý sharalary, saýdadaǵy tehnıkalyq kedergiler, sanıtarlyq jáne fıtosanıtarlyq sharalar, zııatkerlik menshik jáne basqa da saýda aspektileri engizilgen. Bıznesti dáıekti beıimdeý jáne asa sezimtal taýarlar boıynsha táýekelderdi boldyrmaý úshin Kelisim uzaq ótpeli kezeńderdi, al jekelegen jaǵdaılarda taýarlardy erkin saýda rejıminen alýdy kózdeıdi. Bul mynadaı sezimtal salalarǵa tıesili: aýyl sharýashylyǵy (et, sút, astyq ónimderi), metallýrgııa, jáne hımııa ónerkásibi, - dedi senator Álibek Náýtıev.
Sonymen qatar, otandyq óndirýshilerdi qorǵaý maqsatynda Kelisimde qorǵaý sharalarynyń tıimdi paketi, onyń ishinde ımport kúrt ósken jaǵdaıda belgili bir ýaqytqa bajdar nemese kvotalar engizýge múmkindik beretin ekijaqty qorǵaý sharalaryn qoldaný eskerilgen. Búginde Birikken Arab Ámirlikteri aýyl sharýashylyǵy, tamaq ónerkásibi, metallýrgııa, mashına jasaý, hımııa salasy, sondaı-aq IT-sektor jáne jańa tehnologııalar sekildi ekonomıkanyń túrli salalarynda qazaqstandyq kompanııalarmen yntymaqtastyqty damytýǵa múddeli.
- Qazaqstannyń Birikken Arab Ámirlikterimen saýda qatynastarynyń áleýeti zor jáne elder arasyndaǵy qyzyǵýshylyq kóptegen Taıaý Shyǵys memleketteriniń, sondaı-aq Afrıka elderiniń Birikken Arab Ámirlikteri arqyly taýarlar satyp alyp, saýda jasaıtyndyǵyna baılanysty. Birikken Arab Ámirlikterinde qazaqstandyq ónimniń bolýy otandyq bızneske óńirdiń basqa da qarqyndy damyp kele jatqan elderine taýarlardy satýǵa múmkindik beredi. Zańnyń qabyldanýy Qazaqstannyń preferentsııalyq saýda kelisimderiniń jelisin keńeıtýge, sol arqyly eksporttyq baǵyttardy ártaraptandyrýǵa múmkindik beredi, - dedi depýtat.
Budan buryn habarlanǵandaı, Qazaqstan men BAÁ strategııalyq saýda-ınvestıtsııalyq seriktestikti nyǵaıtady.
