Qazaqstan men Azııa damý banki jańa strategııalyq jobalardy iske asyrýdy talqylady
ASTANA.KAZINFORM — Vıtse-premer — ulttyq ekonomıka mınıstri Serik Jumanǵarın Azııa damý bankiniń (ADB) Ortalyq jáne Batys Azııa boıynsha bas dırektory Leıa Gýterrespen kezdesti. Bul týraly Úkimettiń baspasóz qyzmeti habarlady.
Serik Jumanǵarın Leıa Gýterresti jyly qarsy alyp, osy jylǵy shildede qyzmetke taǵaıyndalýymen quttyqtady. Ol 1994 jyldan beri jalǵasyp kele jatqan kópjyldyq áriptestiktiń mańyzyn atap ótti.
— Azııa damý banki biz úshin strategııalyq áriptes. Yntymaqtastyq kezeńinde Bank kólik, energetıka, ShOB, tsıfrlyq damý, áleýmettik birqatar mańyzdy jobany qarjylandyrdy. Búgingi kezdesý áriptestigimizdi odan ári nyǵaıtýǵa, jańa perspektıvalyq bastamalardy júzege asyrýǵa yqpal etetinine senimdimiz. ADB-nyń Qazaqstan boıynsha 2023–2027 jyldarǵa arnalǵan eldik strategııasynyń negizgi basymdyqtary bizdiń ulttyq basymdyqqa tolyq sáıkes keletinin atap ótkim keledi. Qazaqstan budan ári de osy strategııany tıimdi júzege asyrýdy qoldamaq, — dedi ol.
Yntymaqtastyq ornaǵan sátten bastap ADB Qazaqstanǵa tehnıkalyq kómek pen grant túrinde $7 mlrd-tan asa qaryz berdi.
Óz tarapynan Leıa Gýterres qazaqstandyq tarapqa syndarly dıalog úshin alǵys bildirip, ADB Jarǵysyna túzetý boıynsha daýys berý kezinde Qazaqstandy qoldaýdyń mańyzdylyǵyn erekshe atap ótti. Qajetti daýys berý shegine jetýdiń nátıjesinde túzetý Banktiń kredıtteýdiń jıyntyq kólemin 50%-ǵa — $36 mlrd-tan asyrýǵa múmkindik beredi. Onyń aıtýynsha, bul sheshim ADB-nyń damýshy múshe elderdiń damýdaǵy basym mindetterin sheshýdegi kúsh-jigerin qoldaýdy edáýir keńeıtedi.
— Bizdiń yntymaqtastyǵymyzdyń barysynda 1994 jyldan bastap ADB Qazaqstanǵa $7 mlrd-tan kóp qarajat berdi. Biz dástúrli baǵytta da, jańa sektorda da áriptestikti odan ári arttyrýǵa senemiz, — dep atap ótti ol.
Ol sondaı-aq bıyl ADB strategııalyq materıaldardyń qun tizbegin qoldaýǵa arnalǵan asa mańyzdy mıneraldar salasyndaǵy jańa saıasatty júzege asyrýǵa kiriskenin habarlady. Bank osy salada turaqty áleýeti bar Qazaqstandaǵy jańa jobalardy zerdeleýge daıyn.
Vıtse-premer sondaı-aq Qazaqstan Úkimeti ADB, EADB, EQDB jáne Dúnıejúzilik bankti qosqanda, halyqaralyq qarjy uıymdarynyń úzdik álemdik tájirıbesi men usynymdaryn eskere otyryp, MJÁ týraly zańnamany jetildirýde júıeli jumys júrgizip jatqanyn habarlady.
Sońynda taraptar kólik jáne ónerkásiptik ınfraqurylymda, tehnologııada, energetıkada, synı materıaldar salasynda, turǵyn úı qurylysynda jáne basqa da sektordaǵy yntymaqtastyqtyń aǵymdaǵy jáne perspektıvalyq baǵytyn talqylady.
Anyqtama:
Azııa damý banki (ADB) — 69 múshe elden turatyn kópjaqty damý qarjy ınstıtýty. Onyń 50-i Azııa-Tynyq muhıty aımaǵynda jáne 19-y odan tys jerde ornalasqan. Qazaqstan 1994 jylǵy 19 qańtarda ADB múshesi boldy. ADB-nyń negizgi quraldary naqty jobalar men baǵdarlamalardy júzege asyrý úshin múshe elderdiń úkimetteri men jeke sektoryna beriletin qaryzdar, granttar, tehnıkalyq kómek. 1994–2024 jyldar aralyǵyndaǵy ADB-nyń Qazaqstandaǵy ınvestıtsııalyq jobalar men tehnıkalyq kómekti qarjylandyrý kólemi $7 mlrd-tan asady.
Aıta ketelik Bozymbaev Azııa damý bankimen sý jáne energetıka salasyndaǵy jobalardy pysyqtaǵan edi.