Qazaqstan men Azııa damý banki sý salasyndaǵy yntymaqtastyqty kúsheıtedi
ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov Azııa damý bankiniń vıtse-prezıdenti Fatıma ıAsmınmen kezdesti. Taraptar birlesken jobalardyń iske asyrylý barysyn jáne aldaǵy yntymaqtastyqtyń perspektıvalaryn talqylady. Bul týraly vedomstvonyń baspasóz qyzmeti málim etti.
Kezdesýde Aqmola oblysynda Esil kontrrettegishin salý jobasynyń júzege asyrylý barysy qaraldy. Qazirgi ýaqytta jobany qarjylandyrýǵa daıyndaý jáne memlekettik kepildik alý rásimderi júrgizilip jatyr.
Mınıstrliktiń málimetinshe, kontrrettegishtiń jobalyq syıymdylyǵy 873 mln tekshe metr. Nysan tasqyn sýyn jınaqtap, onyń aǵysyn tıimdi retteýge múmkindik beredi. Bul Esil ózeniniń tómengi aǵysyna sýdyń qaýipsiz ótýin qamtamasyz etip, Soltústik Qazaqstan oblysyndaǵy Sergeev jáne Petropavl sý qoımalarynyń turaqty jumys isteýine jaǵdaı jasaıdy. Sonymen qatar ózen jaǵalaýyndaǵy eldi mekenderdi sý basý qaýpin azaıtýǵa múmkindik beredi.
— 2024-2028 jyldarǵa arnalǵan sý salasyn damytýdyń keshendi jospary aıasynda Qazaqstannyń segiz óńirinde sý qoımalaryn salý jáne rekonstrýktsııalaý boıynsha 42 joba irikteldi. Biz osy bastamalardy iske asyrý baǵytynda Azııa damý bankimen yntymaqtastyq máselelerin jan-jaqty pysyqtaýǵa daıynbyz, — dedi Sý resýrstary jáne ırrıgatsııa mınıstri Nurjan Nurjigitov.
Kezdesý qorytyndysy boıynsha taraptar Qazaqstannyń sý qaýipsizdigin qamtamasyz etýge baǵyttalǵan birlesken jobalardy júzege asyrý jáne ózara yntymaqtastyqty odan ári nyǵaıtýǵa daıyn ekenin rastady.
