Qazaqstan men Ázirbaıjan dıplomatııalyq ókildikterdiń ǵımarattaryn salý úshin ózara jer telimderin beredi

ASTANA. 6 jeltoqsan. QazAqparat - Búgin QR Parlamenti Senatynyń jalpy otyrysynda «Qazaqstan Respýblıkasynyń Úkimeti men Ázirbaıjan Respýblıkasynyń Úkimeti arasyndaǵy dıplomatııalyq ókildikterdiń ǵımarattaryn salý úshin jer ýchaskelerin ózara berý týraly kelisimdi ratıfıkatsııalaý týraly» zań qabyldandy.

Atalǵan qujattyń maqsaty eki el arasyndaǵy dástúrli dostastyq qarym-qatynastardy nyǵaıtý bolyp tabylady. Bul rette Qazaqstan elshiliginiń Ázirbaıjan Respýblıkasynda, Ázirbaıjan elshiliginiń Qazaqstan Respýblıkasynda bolýy men jumys isteýiniń jaǵdaılaryn qamtamasyz etý qarastyrylady. Kelisimge sáıkes Ázirbaıjan tarapy Qazaqstanǵa Qazaqstannyń elshiliginiń ǵımarattaryn salý úshin Baký qalasynyń ortalyǵyndaǵy N. Rafıev kóshesi boıynda 1210 kvartaldaǵy jalpy alańy 0,5 gektar jer ýchaskesin jylyna 1 manat mólsherindegi jalǵa alý aqysymen 49 jyl merzimge beredi. Munyń ornyna Qazaqstan Ázirbaıjan Respýblıkasyna olardyń elshiliginiń ǵımarattaryn salý úshin Astana qalasynyń Prezıdenttik saıabaq aýdanyndaǵy Sh. Qaldaıaqov kóshesiniń ońtústigine qaraı ornalasqan jalpy alańy 0,5 gektar jer ýchaskesin 1 teńge mólsherindegi jalǵa alý aqysymen 49 jylǵa paıdalanýǵa beredi.

Kelisim 2011 jyldyń 20 qazanynda Almaty qalasynda jasalǵan.