Qazaqstan men Ázerbaıjandy ortaq tarıh pen rýhanı qundylyqtar baılanystyrady – Murat Nurtileý
ASTANA. KAZINFORM – Bıyl Qazaqstan men Ázerbaıjan arasyndaǵy strategııalyq áriptestik pen odaqtastyq qatynastar týraly shartqa 20 jyl.
- Búgingi basqosý memleketterimizdiń kóp jylǵy jemisti yqpaldastyǵyn jańa ári sapaly deńgeıge kóterýdiń jáne qol jetkizilgen ýaǵdalastyqty júzege asyrý joldaryn saralap alýdyń oraıly sáti dep sanaımyz. Qazaqstan men Ázerbaıjan – qart Kaspııdiń qos jaǵalaýyna ejelden qonys tepken baýyrlas elder. Bizdi túbi bir túrkitildes halyqtar retinde ortaq tarıh, ózara jaqyn mádenıet jáne tamyrlas rýhanı qundylyqtar baılanystyrady, - dedi QR Premer-mınıstriniń orynbasary – Syrtqy ister mınıstri Murat Nurtileý BAQ ókilderi aldynda málimdeme jasaı turyp.
Mınıstrdiń aıtýynsha, qazaq-ázerbaıjan qarym-qatynasy konstrýktıvti saıası dıalogtyń arqasynda qarqyndy damyp keledi.
- Memleket basshylarymyz Qasym-Jomart Toqaevtyń jáne Ilham Álıevtiń sońǵy úsh jylda ózara toǵyz ret jasaǵan memlekettik jáne resmı saparlarynyń nátıjesi ekijaqty yntymaqtastyqty jandandyrýdyń tyń baǵyttaryn aıqyndady. Osy kezeńde strategııalyq áriptestikti nyǵaıtý jáne odaqtastyq ózara is-qımyldy tereńdetý týraly birlesken deklaratsııanyń qabyldanýy jáne joǵary memleketaralyq keńestiń qurylýy elderimizdiń etene baılanysyn jańa deńgeıge kóterdi. Eki el premer-mınıstrleriniń ózara saparlary úkimetaralyq baılanystardy nyǵaıtýǵa eleýli yqpal etti. Kezdesýde parlamentaralyq yqpaldastyqty, onyń ishinde Dostyq tobynyń qarym-qatynasyn odan ári keńeıtý múddesi de tolyq qýattaldy. Biz birqatar kópjaqty format aıasynda ózara qoldaý kórsetýge daıyn ekenimizdi bildirdik, - deıdi vedomstvo basshysy.
Aıta keteıik, búgin elordaǵa Ázerbaıjan Respýblıkasynyń Syrtqy ister mınıstri Djeıhýn Baıramov resmı saparmen keldi.
Sapar aıasynda ázerbaıjandyq mınıstr Qazaqstan Respýblıkasy Premer-mınıstriniń orynbasary – Syrtqy ister mınıstri Murat Nurtileýmen shaǵyn jáne keńeıtilgen quramda kelissóz ótkizdi.
Kezdesý barysynda belgili bolǵandaı, Transkaspıı halyqaralyq dálizi arqyly júk tasymaly 10 mln tonnaǵa artady.
Sondaı-aq Qazaqstan «Baký-Tbılısı-Djeıhan» qubyry arqyly munaı tasymalyn 2,2 mln tonnaǵa ulǵaıtpaq.