Qazaqstan men Ázerbaıjan joǵary bilim berý salasynda 15-ten astam kelisimge qol qoıady
ASTANA. KAZINFORM — QR Premer-Mınıstri Oljas Bektenovtiń Ázerbaıjanǵa resmı sapary aıasynda taraptar ǵylymı basylymdardyń birlesken tizimin bekitý týraly taǵy bir kelisimge qol qoıady, dep habarlaıdy Kazinform tilshisi.
— Búgin bizdiń mınıstrlik pen Ázerbaıjan Respýblıkasy Prezıdenti janyndaǵy Joǵary attestattaý komıssııasy arasynda ǵylymı basylymdardyń birlesken tizimin bekitý týraly taǵy bir kelisimge qol qoıylady. Bul bizdiń elderdiń ǵalymdaryna birlesken basylymdarda jarııalaý, eki eldiń basylymdarynda jarııalaý múmkindigin beredi, — dedi jýrnalısterge bergen suhbatynda Qazaqstan Respýblıkasynyń Ǵylym jáne joǵary bilim mınıstri Saıasat Nurbek.
Mınıstr aldaǵy ýaqytta taraptar ǵylymı granttar men ǵylymı jobalardy saraptaý salasyndaǵy yntymaqtastyqty keńeıtýdi josparlap otyrǵanyn, óıtkeni ǵylymı qaýymdastyq shaǵyn jáne ártúrli kózqarastar men saraptamalardyń ártaraptanýy óte mańyzdy ekenin atap ótti.
Ol buǵan deıin ekvıvalentti aıyrbastaý týraly úlken jeke kelisimge qol qoıylǵanyn eske saldy.
— Endi bakalavrıat, magıstratýra jáne doktorantýrada stýdentter almastyra alamyz, — dedi Saıasat Nurbek.
Sondaı-aq mınıstr Qazaqstan men Ázerbaıjannyń jetekshi ýnıversıtetteri arasynda birqatar ekijaqty kelisimge qol qoıylǵanyn habarlady.
— Elimizdiń jetekshi 22 ýnıversıtetinen de úlken delegatsııa keldi. Erteń Qazaqstan men Ázerbaıjannyń ADA ýnıversıteti, Baký memlekettik ýnıversıteti sııaqty jetekshi ýnıversıtetteri jáne bizdiń jetekshi ulttyq polıtehnıkalyq ýnıversıtetter arasynda 17 ekijaqty kelisimge qol qoıylady, — dep qosty spıker.
Ol 4 naýryzda eki kúndik úlken bilim kórmesi bastalatynyn, onda barlyq qazaqstandyq joǵary oqý oryndarynyń ókilderi bolatynyn aıtty. Olar qazir Qazaqstanda jańa deńgeıge kóterilip kele jatqan oqytý, bilim alý jáne zertteýdiń barlyq múmkindikteri týraly áńgimeleıdi.
Saıasat Nurbektiń aıtýynsha, Qazaqstanda 37-ge jýyq sheteldik ýnıversıtetterdiń fılıaldary ashyldy, olardyń ishinde Kardev ýnıversıteti, Ekseter, Belfasttyń Queen’s ýnıversıteti, Arızona ýnıversıteti, Mınnesota, Herıot-Vatt, KAIST jáne Koreıanyń joǵary tehnologııalyq ınstıtýty sııaqty óte myqty ýnıversıtetter ashyldy.
Mınıstr ǵylym, bilim, atap aıtqanda, joǵary bilim salasyndaǵy kúsh-jigerdi biriktirý, Qazaqstan-Ázerbaıjan ǵylymı qoǵamdastyqtarynyń kúsh-jigerin biriktirý eki el halqynyń qarym-qatynasynyń damýyna tyń serpin beretinine senim bildirdi.
Aıta keteıik, Bakýge resmı sapary barysynda Premer-Mınıstr Oljas Bektenovti Ázerbaıjan Respýblıkasynyń Prezıdenti Ilham Álıev qabyldady.