Qazaqstan men Ázerbaıjan týrıster almasý jaıyn talqylady

ASTANA. QazAqparat - EKSPO-2017 kórmesin ótkizý barysynda Qazaqstan men Ázerbaıjan týrıstermen jumys boıynsha ózara is-qımyldy nyǵaıta túspek. Bul týraly Investıtsııalar jáne damý mınıstrligi Týrızm ındýstrııasy departamentiniń dırektory Marat Iǵalıev Feısbýktaǵy paraqshasynda jazdy.

«Qazaqstan Respýblıkasyndaǵy Ázerbaıjannyń Tótenshe jáne Ókiletti elshisi Rashad Mamadovpen kezdestim. Eki eldiń damýy jáne týrızm salasyndaǵy ózara is-qımyly jónindegi máselelerdi talqyladyq. Elshiniń aıtýynsha, Ázerbaıjanda týrızm sońǵy jyldary jaqsy damyp keledi. 2016 jyldyń qańtar-qyrkúıegi aralyǵynda sol elge kelgen týrıster qatary 1,7 mln adamǵa artqan. Aldyńǵy jyldyń osy kezeńimen salystyrǵanda týrıster sany 169 430 adamǵa, ıaǵnı 10,9 paıyzǵa artqan.

Sonyń ishinde Ázerbaıjanǵa BAÁ-den keletin týrıster sany 34 esege, Reseıden kelýshiler 7,6%-ǵa, Qazaqstannan baratyndar - 17,2%-ǵa, al ırandyqtar - 62,9%-ǵa artqan.

Sondaı-aq, Ázerbaıjanda 2017 jyly elektrondyq vıza júıesi engizilgendigi habarlandy», - dep atap ótti Iǵalıev.

Onyń aıtýynsha, EKSPO-2017 kórmesine týrıster tartý máselesi de talqylanǵan.

«Ázerbaıjandyq tarap Astanaǵa saparlaǵan týrısterdiń keıin óz elderine kelýine múddelilik tanytty. Olar óz kezeginde elderine kelýshi týrısterde Qazaqstanǵa jiberýdi qolǵa alýǵa daıyn», - dep túsindirdi ol.