Qazaqstan men Ázerbaıjan teńizshilerdiń kásibı dıplomyn ózara taný týraly kelisimge qol qoıdy

ASTANA. KAZINFORM — Bıyl 11 naýryzda Memleket basshysynyń Ázerbaıjan Respýblıkasyna sapary barysynda eki eldiń Kólik mınıstrligi men Tsıfrlyq damý jáne kólik mınıstrligi arasynda teńiz kemeleri ekıpajy músheleriniń kásibı dıplomdaryn ózara taný týraly kelisimge qol qoıyldy. Bul týraly Kólik mınıstrliginiń baspasóz qyzmeti málimdedi.

Kelisim bolashaq teńizshilerdi daıarlaý týraly halyqaralyq konventsııanyń talaptaryna sáıkes ázirlendi. Onyń «Aq tizimine» eki memleket te engizilgen. Kelisimge qol qoıý Ázerbaıjan tarapynyń Qazaqstan Respýblıkasy porttarynyń teńiz ákimshiligi beretin teńizshilerdiń kásibı dıplomdaryn tanýyn qamtamasyz etip, qazaqstandyq teńizshilerge Ázerbaıjan týy astynda kemelerde jumys isteýge múmkindik beredi.