Qazaqstan men Ázerbaıjan saýda aınalymyn 1 mlrd dollarǵa jetkizbek

ASTANA. KAZINFORM – QR Syrtqy ister mınıstri Ermek Kósherbaev Baký qalasyna sapary aıasynda Ázerbaıjan prezıdenti Ilham Álıevpen jáne eldiń syrtqy saıası vedomstvosynyń basshysy Djeıhýn Baıramovpen kezdesti, dep habarlaıdy Kazinform-nyń aımaqtaǵy menshikti tilshisi. 

Ázerbaıjan kóshbasshysy Prezıdent Qasym-Jomart Toqaevqa jyly lebizin jetkizip, onyń elder arasyndaǵy odaqtyq qarym-qatynastardy nyǵaıtýdaǵy erekshe rólin atap ótti. Ilham Álıev sondaı-aq Qazaqstandy jańa Konstıtýtsııanyń qabyldanýymen quttyqtap, elde júrgizilip jatqan reformalardy qoldaıtynyn bildirdi.

Kelissóz barysynda saýda-ekonomıkalyq yntymaqtastyqtyń turaqty ekeni aıtyldy.

- Qazaqstan Ázerbaıjan ónimderi úshin mańyzdy naryq, - dep atap ótti Ilham Álıev.

Ol sonymen qatar perspektıvaly jobalardy júzege asyrý jáne ónerkásiptik kooperatsııany damytý úshin 300 mln dollarlyq birlesken ınvestıtsııalyq qor qyzmetin jandandyrý qajettigin atap ótti.

Búginde Eýrazııadaǵy eń perspektıvaly jáne qaýipsiz kólik-logıstıkalyq arterııalardyń biri sanalatyn Orta dálizdi damytýǵa erekshe nazar aýdaryldy. Qazaqstan men Ázerbaıjan ony ilgeriletýde mańyzdy ról atqaryp otyrǵany atap ótildi.

Ázerbaıjan tarapy perspektıvaly jobalardy tańdaǵannan keıin Birlesken ınvestıtsııalyq qorǵa salymdardy arttyrýǵa daıyn ekenin rastady.

Ermek Kósherbaev Ázerbaıjan memleketiniń joǵary damý deńgeıin atap ótti.

- Ázerbaıjanda halqynyń qoldaýyna ıe bolǵan kúshti jáne turaqty memleket qalyptasty. Kórshilerimiz neǵurlym jaqsy ómir súrse, biz úshin soǵurlym jaqsy, - dep atap ótti ol.

Mınıstrdiń aıtýynsha, Qazaqstan men Ázerbaıjan – senimdi dıalog ornatqan senimdi seriktester. Ol sondaı-aq bıylǵy jyly memleket basshylarynyń ózara saparlary josparlanǵanyn, bul ekijaqty yntymaqtastyqqa odan ári serpin beretinin habarlady.

Óz kezeginde Ázerbaıjan syrtqy ister mınıstri Djeıhýn Baıramov ekijaqty yntymaqtastyqtyń joǵary deńgeıin atap ótti.

- Biz baılanystardyń qarqyndy ósýin baıqap otyrmyz. 2025 jyly sonyń ishinde Túrki memleketteri uıymy aıasynda birqatar nátıjeli kezdesýler ótti. Barlyq deńgeıdegi ózara saparlar sátti jalǵasyp keledi, - dep málimdedi ol.

Onyń aıtýynsha, saýda aınalymyn 1 mlrd dollarǵa jetkizý – naqty maqsat.

- Qoldanystaǵy áleýet pen qazirgi serpindi eskergende, biz bul kórsetkishke jaqyn arada qol jetkize alamyz, - dep atap ótti Baıramov.

Yntymaqtastyqtyń negizgi salalary retinde energetıka, kólik, joǵary tehnologııalar jáne aýyl sharýashylyǵy atalǵan. Azyq-túlik qaýipsizdigi jáne astyqpen qamtamasyz etý máselelerin qosa alǵanda eki ekonomıkanyń ózara tolyqtyrylýy atap ótildi.

Týrızm salasynda da oń úrdister tirkelip jatyr – eki eldiń qalalary arasynda aptasyna shamamen 30 reıs oryndalady. Ózara saıahattardyń ósýine ortaq tarıhı-mádenı baılanystar men uqsas mentalıtet septigin tıgizdi.

Gýmanıtarlyq yntymaqtastyq, Mádenıet kúnderin ótkizý, ǵylym men bilim berý salasyndaǵy yntymaqtastyq jáne stýdentterdiń bilim alý múmkindikterin teńdik negizde keńeıtý de basymdyqtar retinde belgilendi.

Taraptar sondaı-aq Kaspıı teńiziniń mártebesin qosa alǵanda negizgi aımaqtyq máseleler boıynsha ortaq ustanymdaryn rastady.

Sapar qorytyndysy boıynsha, Qazaqstan-Ázerbaıjan seriktestigi belsendi saıası dıalogty naqty ekonomıkalyq jáne ınfraqurylymdyq nátıjelermen úılestire otyryp sapaly jańa deńgeıge ótip jatqany rastaldy.

Osyǵan deıin Qazaqstan men Ázerbaıjan 2025 jyldaǵy yntymaqtastyq nátıjelerin qorytyndylaǵanyn jazdyq.