Qazaqstan men Ázerbaıjan saraptama-analıtıka salasyndaǵy yntymaqtastyqty nyǵaıtpaq
Jıynǵa Ázerbaıjan halyqaralyq qatynastardy taldaý ortalyǵynyń basshylyǵy, depýtattar, memlekettik organdar ókilderi, sondaı-aq eki eldiń jetekshi taldaý ortalyqtarynyń basshylary men sarapshylary qatysty.
Kún tártibinde baýyrlas elder arasyndaǵy yntymaqtastyqty odan ári damytýdyń ózekti máseleleri talqylandy.
QR Prezıdenti janyndaǵy Qazaqstan strategııalyq zertteýler ortalyǵynyń dırektory Erkin Tuqymov eki eldiń basshylyǵy men memlekettik organdaryna naqty praktıkalyq usynystar ázirleý úshin ǵylymı-saraptama baǵytynda yntymaqtastyqty nyǵaıtý qajettigin atap ótti.
«Eń aldymen, Ázerbaıjan Qazaqstan úshin mańyzdy odaqtas, Ońtústik Kavkaz aımaǵyndaǵy mańyzdy strategııalyq áriptes. Ekonomıkany ártaraptandyrý jáne kólik-kommýnıkatsııalyq áleýetti keńeıtý máselesi eki el úshin de ózekti», - dedi ol.
Al Ázerbaıjannyń halyqaralyq qatynastardy taldaý ortalyǵynyń basqarma tóraǵasy Farıd Shafıev 30 jyl ishinde Nur-Sultan men Baký ekijaqty qarym-qatynastardy strategııalyq áriptestik deńgeıine deıin nyǵaıtqanyn aıtty.
Qazirgi geosaıası jaǵdaı ózara taýar aınalymyn arttyrýǵa múmkindik beredi. Qazaqstan men Ázerbaıjannyń kólik haby retindegi áleýetin kúsheıtýge bolady. Qazirdiń ózinde ártúrli bıýrokratııalyq protsedýralardy jeńildetý sharalary pysyqtalyp jatyr.
Sharada eki el arasyndaǵy bilim berý salasyndaǵy yntymaqtyń keleshegine, sonyń ishinde qos dıplomdy bilim berý baǵdarlamalaryn ázirleý, ǵalymdar men zertteýshilerdiń qysqa merzimdi saparlaryn uıymdastyrý, sondaı-aq ǵylymı eńbekterdi birlesip basyp shyǵarý máseleleri talqylandy.
Taraptar Bakýde ótetin ekinshi kezdesýge deıin saraptama-analıtıka salasyndaǵy yntymaqtastyqty nyǵaıtýǵa ýaǵdalasty.
