Qazaqstan men Ázerbaıjan prezıdentteri «Astana» halyqaralyq qarjy ortalyǵyna bardy
ASTANA. QazAqparat - Qasym-Jomart Toqaev pen Ilham Álıev Ázerbaıjan Prezıdentiniń resmı sapary aıasynda «Astana» halyqaralyq qarjy ortalyǵyn aralap kórdi, dep habarlaıdy QazAqparat Aqordanyń resmı saıtyna silteme jasap.
Memleketter basshylary AHQO-daǵy Halyqaralyq sottyń jumysymen tanysty. «Astana» halyqaralyq qarjy ortalyǵy sotynyń tirkeýshisi jáne apparat jetekshisi Krıstofer Kempbell-Holt Ortalyq Azııadaǵy aǵylshyn quqyǵy normalary men qaǵıdattaryna negizdelgen eń alǵashqy sot júıesi týraly baıandady. Ol sottyń AHQO-daǵy azamattyq jáne kommertsııalyq daýlardy sheshý úshin eń úzdik halyqaralyq standarttar boıynsha jumys isteıtinin jetkizdi.
Budan keıin Qasym-Jomart Toqaev pen Ilham Álıev Ortalyqtyń Qarjylyq qyzmet kórsetýdi retteý jónindegi komıtetiniń, bıznesti damytý jónindegi tobynyń, «AHQO-daǵy venchýrlyq qarjylandyrý jáne tehnologııalyq ınnovatsııalardy damytý týraly» Teh Habynyń jumysymen tanysty.
Sonymen qatar eki el prezıdentterine Ekspat ortalyǵynyń «AHQO-da tirkelgen kompanııalardy «bir tereze» qaǵıdaty boıynsha qoldaý qyzmeti» týraly málimet berildi. «Astana» halyqaralyq qarjy ortalyǵynyń basqarýshysy Renat Bekturov memleketter basshylaryna AHQO-nyń jumysy týraly baıandady.
Іs-shara sońynda Ázerbaıjan Prezıdenti «Astana» halyqaralyq qarjy ortalyǵynyń Qurmetti qonaqtar kitabyna qoltańba qaldyrdy.
