Qazaqstan men Ázerbaıjan prezıdentteri Fızýlı qalasyn damytýǵa arnalǵan bas josparmen tanysty
BAKÝ.KAZINFORM – Qasym-Jomart Toqaev Ázerbaıjan Respýblıkasyna jasaǵan memlekettik saparynyń ekinshi kúni Ilham Álıevpen birge Fızýlı qalasyndaǵy qıraǵan jerlerdi aralap kórip, shahardy damytýǵa arnalǵan bas josparmen tanysty.
Memleketter basshylaryna qalany jáne onyń tóńiregindegi aýmaqtardy qaıta qalpyna keltirý úshin qolǵa alynǵan sharalar týraly málimet berildi. Sondaı-aq shahardyń jańa kelbeti: keleshek ákimshilik ortalyqtyń, saıabaqtyń jáne basqa da mańyzdy nysandardyń eskızderi men jobalary kórsetildi.
«Budan bólek, eki el prezıdentterine qazirgi ýaqytta qalada aýqymdy qurylys jáne qaıta qalpyna keltirý jumystary júrgizilip jatqany jóninde baıandaldy. Byltyr mamyr aıynda qala ishindegi kósheler men joldar jelisiniń negizi qalanyp, aýyzsýmen qamtamasyz etý, káriz jáne jaýyn sýynyń aǵyp ketý júıesin tartý jumystary bastalǵan», - delingen habarlamada.
Sondaı-aq tsıfrlyq qosalqy stantsııa men «Fızýlı» basqarý ortalyǵy iske qosylǵan. Sonymen qatar bir mezgilde ákimshilik ǵımarattardyń, kommýnaldyq úı-jaılardyń, turǵyn úı kvartalynyń qurylysy bastalǵan. Qazir Fızýlıde 38 kópqabatty ǵımarattyń qurylysy júrgizilip jatyr.
Eske sala keteıik, memleket basshysy Qasym-Jomart Toqaev Fızýlı qalasyna saparmen barǵanyn jazǵan bolatynbyz. Al, eki eldiń ózara qarym-qatynasy jáne Qasym-Jomart Toqaevtyń Ázerbaıjanǵa saparynan ne kútýge bolatynyn tilshiniń sholýynan oqı alasyz.
