Qazaqstan men Ázerbaıjan prezıdentteri ekonomıka men geosaıasatqa qatysty pikir bólisti
Armenııa men Ázerbaıjan arasyndaǵy beıbitshilikke qol jetkizý múmkin be? Qazaqstannyń Reseımen qarym-qatynasyna kózqarasy qalaı? Ázerbaıjan men Qazaqstan prezıdentteri Euronews-ke bergen eksklıýzıvti suhbatynda ekonomıka jáne geosaıasattaǵy strategııalardy talqylady. Kazinform bul týraly Euronews-ke silteme jasap habarlaıdy.
Jaqynda Baký qalasynda BUU jetekshiligimen óńirlik ekonomıkalyq konferentsııa ótti. Onda SPEKA-ǵa múshe elderdiń Ortalyq Azııa, Aýǵanstan jáne Ázerbaıjandaǵy basshylary bas qosty.
Euronews tilshisi Galına Polonskaıa Ázerbaıjan prezıdenti Ilham Álıevpen jáne Qazaqstan prezıdenti Qasym-Jomart Toqaevpen áńgimelesip, óńirdegi ekonomıkalyq strategııalar, sondaı-aq kórshi eldermen qarym-qatynas týrasynda suhbat qurdy.
«Prezıdent Álıev Ázerbaıjannyń ekonomıkalyq ósimin reformalarmen, kedeılikti azaıtýmen jáne syrtqy qaryzdy basqarýmen baılanystyrady. Qazaqstan 5% ósimdi kózdep otyr, al prezıdent Toqaev halyqaralyq yntymaqtastyqty, ınvestıtsııany jáne 2029 jylǵa qaraı ekonomıkalyq áleýetti eseleý mindetin qoıyp otyr», - dep jazady Euronews.
Ilham Álıev óz sózinde Ázerbaıjannan Eýropaǵa gaz eksportynyń mańyzdylyǵyna jáne onyń Eýropanyń energetıkalyq qaýipsizdigine qosyp otyrǵan úlesine, sondaı-aq jasyl energetıka sektoryna salynǵan ınvestıtsııaǵa toqtaldy.
Qasym-Jomart Toqaev Qazaqstannyń energetıkalyq bıznesin ómirlik mańyzdy dep sanaıtynyn aıtyp, el 2060 jylǵa qaraı parnıktik gazdar shyǵaryndylaryn nóldik deńgeıge jetkizýdi maqsat etip otyrǵanyn qosyp ótti.
QR Prezıdenti Reseı «Qazaqstannyń strategııalyq seriktesi» ekenin málimdep, eldiń óńirdegi mańyzdylyǵyn moıyndady. Sondaı-aq «halyqaralyq arenadaǵy keıbir kúızelisterge qaramastan, Qazaqstan men Reseı únemi yntymaqtastyqta bolatynyn» basa aıtty. .
Taýly Qarabaqtaǵy qaqtyǵys máselesine toqtalǵan prezıdent Álıevtiń sózinshe, Armenııamen bitimgerlik kelisimge «bes negizgi qaǵıdat» negiz bolýy tıis, onyń ishinde «bir-biriniń aýmaqtyq tutastyǵyn ózara moıyndaý» jáne «Armenııaǵa qatysty kúsh qoldanbaý, terrıtorııaǵa qatysty shaǵymdardyń bolmaýy» bar.
Ázerbaıjan men Qazaqstan prezıdentteri ekonomıkalyq strategııa men geosaıasatqa qatysty oılaryn ortaǵa saldy.
