Qazaqstan men Ázerbaıjan prezıdentteri Alem.AI halyqaralyq jasandy ıntellekt ortalyǵyna bardy
ASTANA. KAZINFORM — Ortalyqta Qasym-Jomart Toqaev pen Ilham Álıev tsıfrlyq tehnologııalardy damytý jáne jasandy ıntellektini qoldaný jetistikterimen tanysty. Bul týraly Aqordanyń baspasóz qyzmeti habarlady.
Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Mádıev mártebeli meımandarǵa memlekettik úderisterdi basqarýǵa jáne taldaýǵa, sondaı-aq GovTech-sheshimder qabyldaýǵa arnalǵan AI-Driven Government ahýaldyq ortalyǵynyń tujyrymdamasy jóninde baıandady.
Sonymen qatar memleketter basshylaryna Smart City tehnologııalary, robotty tehnıka aımaǵy, túrli salaǵa jasandy ıntellektini engizýge baǵyttalǵan Samruk-Kazyna jobalary kórsetildi.
Prezıdentter Astana Hub ınnovatsııalyq klasterin aralap kórdi. Ortalyqta 1800-den astam IT-kompanııa men startap, onyń ishinde sheteldiń úlesi bar 460-tan asa kompanııa tirkelgen.
Budan bólek, Qasym-Jomart Toqaev pen Ilham Álıevke halyqaralyq naryqqa shyqqan qazaqstandyq kompanııalardyń ónimderi jaıynda málimet berildi.
Eske sala keteıik, buǵan deıin Qazaqstan men Ázerbaıjan prezıdentteri brıfıng ótkizgenin habarlaǵan edik.