Qazaqstan men Ázerbaıjan óńirdiń týrıstik kartasyn keńeıtip jatyr
BAKÝ. KAZINFORM — Ázerbaıjannyń Gýba qalasynda eki eldiń memlekettik organdary, týrıstik kompanııalary men bıznes ókilderiniń basyn qosqan II Qazaqstan-Ázerbaıjan týrıstik forýmy ótti, dep habarlaıdy Kazinform menshikti tilshisi.
Úsh kúnge sozylǵan sharaǵa Qazaqstannyń Ázerbaıjandaǵy elshisi Álim Baıel, Gýba qalasynan Mıllı Medjlıs depýtaty Alıbala Maharramzade, Ázerbaıjannyń Memlekettik týrızm agenttiginiń ókilderi, qoǵam qaıratkerleri jáne eki eldiń 56 týrıstik kompanııasynyń ókilderi qatysty.
Óziniń quttyqtaý sózinde elshi Álim Baıel baýyrlas eki el arasyndaǵy týrıstik aǵynnyń artqanyn atap ótti.
— Qazaqstan úlesine Ázerbaıjanǵa Ortalyq Azııadan keletin barlyq týrısttiń shamamen 50 paıyzy tıip otyr. Qazaqstan Ázerbaıjanǵa keletin týrıster sany boıynsha Reseı, Túrkııa, Úndistan, Iran jáne Grýzııadan keıin 6-shy orynda. Ázerbaıjan qazaqstandyqtardy Bakýdiń sulýlyǵymen, kórkem tabıǵatymen, mádenı jáne tildik jaqyndyǵymen, sondaı-aq turaqty tikeleı reısterdiń bolýymen qyzyqtyrady, — dedi dıplomat.
Álim Baıel Qazaqstan-Ázerbaıjan ınvestıtsııasyn tarta otyryp, Qazaqstandaǵy Alakól kóliniń jaǵasynda josparlanǵan saýyqtyrý kesheniniń qurylysynyń mańyzdylyǵyna erekshe toqtaldy. Onyń aıtýynsha, zamanaýı keshenniń qurylysy eki eldiń týrızm salasyndaǵy yntymaqtastyǵyndaǵy mańyzdy oqıǵa bolmaq.
Depýtat Alıbala Magerramzade Qazaqstannan Ázerbaıjanǵa ǵana emes, kerisinshe, keri baǵytta da týrıster aǵynyn arttyrýdyń mańyzdylyǵyn erekshe atap ótti. Parlament depýtaty eki ultty jaqyndastyrýda, bir-biriniń mádenıeti men salt-dástúrin zerdeleýde týrızm salasy mańyzdy ról atqaratynyna senimdi.
Qatysýshylardy Ázerbaıjannyń Memlekettik týrızm agenttigi, eki eldiń týrıstik kompanııalary men Air Astana áýe kompanııasy ókilderiniń prezentatsııalary erekshe qyzyqtyrdy. Olar Qazaqstan men Ázerbaıjannyń tabıǵı sulýlyǵyna, mádenı murasyna jáne kórikti jerlerine nazar aýdara otyryp, jańa týrıstik paketterdi, marshrýttar men baǵyttardy usyndy.
Іs-shara aıasynda V2V formatyndaǵy kezdesýler, sondaı-aq qazaqstandyq qonaqtarǵa Gýba aımaǵynyń týrıstik áleýeti kórsetilgen tanystyrý saparlary ótti.
Forým eki eldiń týrıstik yntymaqtastyqty keńeıtýge joǵary múddeliligin rastady jáne ózara týrıstik aǵyndy ulǵaıtý jáne Qazaqstan men Ázerbaıjandy aımaqtaǵy saıahatshylar úshin tartymdy etetin jańa birlesken jobalar úshin múmkindikter ashty.
Eske sala ketsek, Bakýde Qazaqstan-Ázerbaıjan týrıstik forýmy alǵash ret 2024 jyly ótti.