Qazaqstan men Ázerbaıjan munaı-gaz salasynda birlesken kásiporyn qurmaq

ASTANA. QazAqparat - Qazaqstan men Ázerbaıjan munaı-gaz salasynda birlesken kásiporyn qurmaq. Bul týraly búgin Qazaqstan men Ázerbaıjan arasyndaǵy ekonomıkalyq yntymaqtastyq jónindegi úkimetaralyq komıssııanyń 15-otyrysy aldynda BAQ ókilderine suhbat bergen Ázerbaıjan Energetıka mınıstri Pıarvız Shahbazov aıtty, dep habarlaıdy QazAqparat tilshisi.

«Munaı-gaz ónerkásibi salasyn alatyn bolsaq, birlesken kásiporyn qurý múmkindigin qarastyryp jatyrmyz. Óıtkeni, Ázerbaıjan Qazaqstan sııaqty munaı-gaz ónerkásibin damytýda mol tarıhqa ıe. Búginde Qazaqstan munaı men gaz óndirý salasyndaǵy iri jobalarǵa ıe jáne biz ózara tıimdi sharttarmen birlesken kásiporyn qurý arqyly kish-jigerimizdi biriktire alamyz», - dedi ol.

Sonymen qatar Ázerbaıjan mınıstri eki eldiń arasynda aýyl sharýashylyǵyn damytýǵa da múmkindigi bar ekenin basa aıtty.

«Biz jaqsy júmys istedik. Ázerbaıjanǵa astyq jetkizýdiń esebinen taýar aınalymy ósti. Jalpy, Ázerbaıjan aýyl sharýashylyǵy damyǵan el sanalady jáne biz Qazaqstanǵa kóptegen ónimder jetkize alamyz. Sondyqtan bul saladaǵy qyzmetimizdi odan ary jalǵastyrýǵa ýaǵdalastyq. Týrızm salasyn damytý, Kaspıı teńizinde jańa krýızder uıymdastyrý múmkinshiligi, eki eldiń arasyndaǵy vızalyq rejımdi jeńildetý máselelerin qarastyrdyq», - dedi P.Shahbazov.

Óz kezeginde Qazaqstannyń Energetıka mınıstri Qanat Bozymbaev elimizdiń aýmaǵynda ázerbaıjan kapıtalynyń qatysýymen munaı qural-jabdyqtaryn shyǵaratyn zaýyt salý máselesi talqylanyp jatqanyn aıtty.

«Sonymen qatar,  Aqtaýda suıytylǵan gaz óndiretin zaýyt qurylysyn qarastyryp jatyrmyz. Ónim odan ary Ázerbaıjanǵa eksporttalady. Bul másele búginginiń kúntártibinde tur. Qazirgi ýaqytta bul máseleni jan-jaqty talqylap jatyrmyz», - dedi Qanat Bozymbaev.