Qazaqstan men Ázerbaıjan medıtsınalyq týrızm salasyndaǵy yntymaqtastyqty nyǵaıtty

BAKÝ. QazAqparat – Qazaqstannyń Ulttyq kýrorttyq qaýymdastyǵy Qazaqstan Respýblıkasynyń Ázerbaıjandaǵy Elshiliginiń qoldaýymen densaýlyq saqtaý salasynda ekijaqty baılanysty odan ári damytý maqsatynda Ázerbaıjan eliniń A.Karaev atyndaǵy fızıologııa ınstıtýty jáne Nahıchevan avtonomdyq respýblıkasyndaǵy «Dýzdag» Fızıologııalyq ortalyǵymen yntymaqtastyq jáne ózara árekettestik týraly memorandýmdarǵa qol qoıdy, dep habarlaıdy QazAqparat.

Memorandým maqsaty – medıtsınalyq týrızm, sanatorlyq-shıpajaılyq emdeý salasyndaǵy yntymaqtastyqty damytý, jańa medıtsınalyq-bıologııalyq jáne bıomedıtsınalyq zertteýler salasynda tájirıbe almasý, saýyqtyrý salasynda birlesken jobalar men trenıng baǵdarlamalaryn ótkizý.

Budan basqa, qol qoıylǵan qujattar Qazaqstan men Ázerbaıjan arasynda eki eldiń shıpajaılaryna emdeý-saýyqtyrý protsedýrasyna baratyn týrıster aǵynynyń kóbeıýine septigin tıgizedi.