Qazaqstan men Ázerbaıjan Kúres federatsııalary yntymaqtastyqty keńeıtti
ASTANA. KAZINFORM – Qazaqstan kúres federatsııasynyń tóraǵasy Erkin Oqasov bastaǵan delegatsııa 17 jasqa deıingi sportshylar arasyndaǵy álem chempıonatyna qatysý jáne birqatar jumys kezdesýin ótkizý maqsatynda Ázerbaıjan astanasy Bakýǵa bardy.
Sapar barysynda E.Oqasov jáne Qazaqstannyń Bakýdaǵy Elshisi Álim Baıel Ázerbaıjan Respýblıkasynyń ekonomıka mınıstri, Ázerbaıjan kúres federatsııasynyń basshysy Mıkaıl Djabbarovpen ekijaqty kezdesý ótkizdi. Kelissózde ulttyq quramalardy daıarlaý, birlesken oqý-jattyǵý jıyndaryn uıymdastyrý, bapkerler men sala mamandarynyń tájirıbe almasýy, sondaı-aq jasóspirimder kúresin damytýǵa baǵyttalǵan ortaq jobalar talqylandy.
Kezdesý qorytyndysynda eki federatsııa arasynda baýyrlas elder úshin dástúrli de mańyzdy sport túri sanalatyn kúres salasyndaǵy yntymaqtastyq týraly memorandýmǵa qol qoıyldy. Bul memorandým eki eldiń arasyndaǵy sporttyq baılanysty jańa deńgeıge kóterip, ulttyq quramalardyń birlesken oqý-jattyǵý jıyndaryn ótkizýine, halyqaralyq jarystarǵa qatysýyna jáne sportshylar daıarlaý tájirıbesimen almasýyna múmkindik bermek.
Atap aıtqanda, taraptar jattyqtyrýshylar men tóreshilerdiń biliktiligin arttyrý, sporttyq medıtsına, sportshylardyń densaýlyǵyn saqtaý, tamaqtaný, psıhologııalyq daıyndyq jáne nátıjelerdi saraptaý baǵyttaryndaǵy yntymaqtastyqty damytýǵa ýaǵdalasty. Sonymen qatar áıelder jáne jasóspirimder kúresin qoldaý, buqaralyq jobalardy júzege asyrý, daryndy sportshylardy daıarlaý men Olımpıadaǵa daıarlaý júıesin jetildirý máselelerine erekshe nazar aýdaryldy. Bul kelisim Qazaqstan men Ázerbaıjan arasyndaǵy dástúrli dostyq baılanystyń sport salasyndaǵy jalǵasy bolyp, eki el balýandary men mamandary úshin jańa múmkindikterdi ashady dep josparlanǵan.
Aıta ketý kerek, Bakýda bastalǵan 17 jasqa deıingi sportshylar arasyndaǵy álem chempıonatynda Qazaqstan quramasynyń 30 balýany grek-rım, erkin jáne áıelder kúresinen synǵa túsedi.
Qazaqstan quramasyndaǵy eki balýan U17 álem chempıonatynyń jartylaı fınalyna shyqqanyn jazǵan edik.
