Qazaqstan men Ázerbaıjan kóshi-qon salasynda kelisim ornatty

NUR-SULTAN. QazAqparat – Májiliste «Qazaqstan men Ázerbaıjan úkimetteriniń kóshi-qon salasyndaǵy yntymaqtastyq týraly kelisimdi ratıfıkatsııalaý týraly» zań jobasy maquldandy, dep habarlaıdy QazAqparat.

QR Іshki ister mınıstri Erlan Turǵymbaevtyń aıtýynsha, kelisimge 2019 jyly 14 qazanda Baký qalasynda qol qoıylǵan. Al Ázerbaıjan parlamenti kelisimdi 2019 jyly 14 jeltoqsanda bekitken.

«Bul qujat azamattyq týraly aqparat almasýǵa, zańsyz kóshi-qonmen kúresýge múmkindik beredi. Naqty aıtsaq, statıstıka men aqparat almasýǵa, azamattar týraly jeke málimet alýǵa, tájirıbe almasý, praktıkalyq kómek kórsetýge, zańsyz kóshi-qon joldaryn joıýǵa múmkindik beredi. Qazaqstan men Ázerbaıjan azamattarynyń quqyqtyq mártebesi anyqtalady», - dep túsindirdi mınıstr Májilistiń jalpy otyrysynda.

Onyń aıtýynsha, 2018 jyly Qazaqstanǵa Ázerbaıjannan 50 myńǵa jýyq azamat kelse, 2019 jyly – 48 myńnan asqan. Al Qazaqstannan 2018 jyly 28 myń, 2019 jyly – 29 myń azamat Ázerbaıjanǵa barǵan. Al ótken jyly pandemııaǵa baılanysty, kelip-ketetin azamattar sany 5 myńǵa deıin azaıǵan.

«Búginde Іshki ister mınıstrligi kóshi-qon boıynsha 23 halyqaralyq kelisimge qol qoıdy. Halyqaralyq deńgeıde taǵy 8 kelisim ázirlenýde. Osy kelisimder nátıjesinde zańsyz kóshi-qon boıynsha aqparat almasý, adamdardy basqa elderge qaıtarý, sheteldikterdiń Qazaqstanda bolý merzimi, qos azamattyqqa jol bermeý máseleleri sheshildi», - deıdi E. Turǵymbaev.