Qazaqstan men Ázerbaıjan Kaspııde jolaýshylar tasymalyn jandandyrmaq
ASTANA. KAZINFORM - Bul týraly Qazaqstannyń Ázerbaıjandaǵy Elshisi Álim Baıel málimdedi.
Dıplomattyń aıtýynsha, Qazaqstan tarapy Ázerbaıjanǵa Quryq – Baký – Quryq porttary parom jelisinde jolaýshylar tasymalyn qaıta bastaýdy usyndy. 2020 jylǵa deıin júzege asyrylǵan bul tasymaldar COVID-19 pandemııasyna baılanysty toqtatylǵan bolatyn.
Álim Baıel paromdyq tasymaldaý toqtaǵanǵa deıin Kaspıı teńizi arqyly jylyna 1500-ge jýyq jolaýshy júrgenin atap ótti. Ol aldaǵy ýaqytta osy baǵyt boıynsha saıahattaýǵa nıet bildirgen jolaýshylardyń sany artatynana senim bildirdi. Parom jelisin qaıta iske qosý eki el arasyndaǵy jolaýshylar qatynasynyń damýyna serpin beredi, týrıstik almasýdy kúsheıtedi jáne orta dálizdiń múmkindikterin keńeıtedi.
Elshi Ázerbaıjan tarapynyń Qazaqstannyń usynysyn qoldaǵanyn atap ótti. Qazirgi ýaqytta eki eldiń kólik vedomstvolary jolaýshylar qatynasyn shuǵyl qalpyna keltirý boıynsha jumystardy bastap ketti.
Búginde Baký men Qazaqstannyń Astana, Almaty, Shymkent, Aqtaý, Atyraý sııaqty qalalary arasynda aptasyna 37 áýe reısi qatynaıdy.
Osyǵan deııin Qazaqstan men Ázerbaıjan ekonomıkanyń jańa modelin qalaı qalyptastyryp jatqany týraly jazdyq.
