Qazaqstan men Ázerbaıjan Kaspıı teńiziniń túbinen «jasyl» energııa kabelin qashan tóseıdi

ASTANA. KAZINFORM — Qazaqstannyń energetıka mınıstri Erlan Aqkejenov Qazaqstan men Ázerbaıjan arasynda Kaspıı teńiziniń túbinen «jasyl» energııa kabelin tóseý jobasynyń daıyndyq barysy týraly aıtyp berdi, dep habarlaıdy Kazinform agenttiginiń tilshisi.

— Ázerbaıjanmen negizgi yntymaqtastyq taqyryby — energetıka, ol munaıdy Baký-Tbılısı-Djeıhan arqyly qosymsha marshrýtpen tasymaldaý jáne Kaspıı teńiziniń túbinen «jasyl» energııa kabelin tóseý. Qazirgi ýaqytta kásiporyn quryldy, tehnıkalyq-ekonomıkalyq negizdemege qarjy bólindi, — dedi mınıstr Májilis kýlýarynda.

Onyń aıtýynsha, qarajat eki bank tarapynan bólindi, sonyń ishinde Azııa damý banki.

— Qazir tehnıkalyq-ekonomıkalyq negizdeme daıyndalý máselesi qarastyrylyp jatyr. Ol aıaqtalǵan soń jobanyń naqty quny belgili bolady da, sheshim qabyldanady, — dedi Aqkejenov.

Eske salsaq, 20–21 qazan kúnderi Qazaqstan Prezıdenti Qasym-Jomart Toqaevtyń shaqyrýymen Ázerbaıjan Prezıdenti Ilham Alıev Qazaqstanǵa memlekettik saparmen keldi.

Jalpy sapar aıasynda energetıka, kólik pen logıstıka, tsıfrlandyrý jáne jasandy ıntellekt, ónerkásip qaýipsizdigi, densaýlyq saqtaý men statıstıka, mádenı-gýmanıtarlyq baılanystar salalarynda 15 yntymaqtastyq qujatqa qol qoıyldy.