Qazaqstan men Ázerbaıjan Kaspıı arqyly júk tasymaldaýdyń jańa júıesin iske qospaq
ASTANA. KAZINFORM — Qazaqstan men Ázerbaıjan Kaspıı teńizi arqyly vagondardy júk túsirip, qaıta tıeýsiz tasymaldaýǵa múmkindik beretin «Kaspıı kópiri» jobasyn júzege asyrmaq. Jańa júıe arqyly jylyna 8 mln tonna júk tasymaldaý, keıin kólemdi 12 mln tonnaǵa deıin jetkizý josparlanyp otyr. Bul týraly Kólik mınıstrligi málim etti.
Qazaqstan Respýblıkasy Kólik mınıstrliginde kólik mınıstri Nurlan Saýranbaevtyń Qazaqstandaǵy Ázerbaıjan elshisi Alımırzamın Aleskerovpen jáne AZCON Holding ókili Shahın Babaevpen kezdesýi ótti.
Kezdesýde Transkaspıı halyqaralyq kólik baǵytyn, ıaǵnı Orta dálizdi damytý jáne «Kaspıı kópiri» jobasyn iske asyrý máseleleri talqylandy.
Jobanyń negizgi ereksheligi — paromdardy temirjoldyń jalǵasy retinde paıdalaný. Bul vagondardy Kaspıı teńizi arqyly júk túsirip, qaıta tıeý qajettiliginsiz jetkizýge múmkindik beredi. Nátıjesinde tasymal úderisin ońtaılandyryp, júk jetkizý ýaqytyn qysqartý kózdelip otyr.
Jobanyń bastapqy maqsaty — jylyna 8 mln tonna júk tasymaldaý. Aldaǵy ýaqytta bul kólemdi 10–12 mln tonnaǵa deıin jetkizý josparlanǵan.
Ázerbaıjan delegatsııasynyń sapary aıasynda «Samuryq-Qazyna» AQ men AZCON Holding jobany daıyndaý jáne júzege asyrý boıynsha yntymaqtastyq týraly kelisimge qol qoıdy.
Sonymen qatar «Qazaqstan temir joly» ulttyq kompanııasy men «Ázerbaıjan temir joldary» AJQ Alıat portynda birlesken ıntermodaldy júk termınalyn qurýdyń negizgi sharttaryn bekitetin qujatqa (Term Sheet) qol qoıdy.
Kezdesýde taraptar birlesken termınaldar jelisin qalyptastyrý, lokomotıv jáne keme jasaý salalaryndaǵy óndiristik yntymaqtastyqty damytý máselelerin de qarastyrdy. Budan bólek, tarıf saıasatyn úılestirý jáne júkterdi Eýropaǵa jetkizý ýaqytyn qysqartý joldary talqylandy.
Taraptar kólik salasyndaǵy birlesken jumysty jalǵastyrýǵa múddeli ekenin rastady. Negizgi basymdyqtar — Orta dálizdiń ótkizý qabiletin arttyrý, kólik ınfraqurylymyn damytý jáne Kaspıı teńizi arqyly júk tasymaldaýdyń tıimdiligin kúsheıtý.
