Qazaqstan men Ázerbaıjan Kaspıı arqyly jolaýshylar tasymalyn qaıta iske qospaq
ASTANA. KAZINFORM – Qazaqstan men Ázerbaıjan Quryq – Baký – Quryq baǵytyndaǵy parom jelisi arqyly jolaýshylar tasymalyn qaıta jandandyrý boıynsha jumysty bastady.
Qazaqstannyń Ázerbaıjandaǵy Elshisi Álim Baıel Baký halyqaralyq teńiz portynyń (Alıat porty) bas dırektory Eldar Salahovpen kezdesip, eki eldiń kólik-logıstıka salasyndaǵy yntymaqtastyǵyn damytý máselelerin talqylady.
Kezdesýde Alıat porty men Qazaqstannyń Aqtaý jáne Quryq porttary arasyndaǵy baılanysty damytý, konteınerlik tasymaldy qosa alǵanda, júk kólemin arttyrý jáne birlesken ınfraqurylymdyq jobalardy iske asyrý máselelerine erekshe nazar aýdaryldy.
Álim Baıel Qazaqstannyń Quryq – Baký – Quryq porttary arasyndaǵy parom jelisinde jolaýshylar tasymalyn jandandyrý bastamasyn qoldaǵany úshin ázerbaıjan tarapyna alǵys bildirdi.
Buǵan deıin Kaspıı teńizi arqyly osy baǵyttaǵy jolaýshylar tasymalyn jylyna shamamen 1 500 adam paıdalanǵan. Qazaqstandyq dıplomat parom jelisi qaıta iske qosylǵannan keıin saıahatshylar sany artady degen senim bildirdi.
– Parom jelisiniń qaıta iske qosylýy eki el arasyndaǵy jolaýshylar qatynasynyń damýyna serpin berip, týrıstik almasýdy kúsheıtedi jáne Orta dálizdiń múmkindikterin keńeıtedi, – delingen aqparatta.
Eldar Salahov Baký portynyń qazaqstandyq seriktestermen yntymaqtastyqty odan ári tereńdetýge múddeli ekenin atap ótti. Onyń aıtýynsha, jolaýshylar tasymalyn qaıta bastaý boıynsha jumys qazaqstandyq áriptestermen tyǵyz baılanysta júrgizilip jatyr.
Kezdesýde Alıat portynda birlesken ıntermodaldy termınal salý máselesi de kóterildi. Álim Baıel buǵan deıin qol jetkizilgen ýaǵdalastyqtarǵa sáıkes termınal qurylysyn jedeldetýge shaqyrdy.
Baký portynyń bas dırektory nysan qurylysynyń qazirgi jaǵdaıy týraly málimet berip, portty damytýdyń bas josparyn jańartý aıaqtalǵannan keıin termınal qurylysy jalǵasatynyn jetkizdi.
Kezdesý qorytyndysynda taraptar Qazaqstan men Ázerbaıjan arasyndaǵy kólik-logıstıkalyq baılanysty nyǵaıtýǵa baǵyttalǵan birlesken jobalardy qoldaýǵa jáne ózara is-qımyldy jalǵastyrýǵa daıyn ekenin rastady.
Alıat porty Bakýden ońtústikke qaraı 70 shaqyrym jerde ornalasqan. Ol Kaspıı teńizindegi Ázerbaıjannyń negizgi zamanaýı teńiz logıstıkalyq toraby ári Eýropa, Kavkaz, Ortalyq Azııa jáne Qytaıdy baılanystyratyn Orta dálizdiń mańyzdy býyny sanalady.
Aıta keteıik, Qazaqstan Ázerbaıjan arqyly energııa resýrstary tranzıtin arttyrmaq.
