Qazaqstan men Ázerbaıjan kásipkerleri yntymaqtastyǵy keńeımek

BAKÝ. QazAqparat - Bakýde Ázerbaıjandaǵy Qazaqstan Elshiliginiń jáne «AZPROMO» Ázerbaıjan eksport jáne ınvestıtsııalar tartý qorynyń qoldaýymen qazaqstandyq taýar belgilerin damytý boıynsha Qazaqstan-Ázerbaıjan bıznes-forýmy ótti, dep habarlaıdy QazAqparat tilshisi.

Іs-sharaǵa Qazaqstan men Ázerbaıjannyń mashına jasaý, qurylys, elektr energııasy, temirjol, jıhaz jáne tamaq óndirisi salalarynan 50 kásipker qatysty.

AZPROMO prezıdenti Rýfat Mammadov bıznes-forýmdy asha otyryp, Qazaqstan men Ázerbaıjandy baýyrlastyq pen dostastyqtyń, saıası deńgeıdegi tyǵyz qarym-qatynastyń baılanystyryp turǵandyǵyn tilge tıek etti.

Sondaı-aq, ol qazirgi ózara saýda aınalymy men ınvestıtsııa kóleminiń joǵary deńgeıde ekendigin atap ótip, osy sharanyń ózara tıimdi saýda baılanysyn qalyptastyratynyna senim bildirdi.

Ázerbaıjandaǵy Qazaqstan Elshisi Beıbit Isabaev Ázerbaıjannyń Kavkaz óńirindegi Qazaqstannyń mańyzdy saýda-ekonomıkalyq áriptesi ekendigin aıtty. Spıker eki memleket basshysynyń 2020 jylǵa deıin ózara saýda aınalymyn 2-2,5 esege ósirip, ónimder sanyn arttyrý mindetin qoıǵandyǵyn eske saldy.

Іs-shara barysynda «KazakhExport» jáne «AZPROMO» kompanııalary yntymaqtastyq týraly kelisimge qol qoıdy. Sondaı-aq, eki el kásipkerleriniń B2B kezdesýi ótti.

Qazaqstan delegatsııasynyń Bakýge sapary aıasynda qazaqstandyq kompanııalar Ázerbaıjannyń energetıka mınıstrligi, kólik basqarmasy, «Ázerbaıjan temir joly» AAQ, AZPROMO, AzerıYshyg, BakuBus ókilderimen kezdesýi ótti.