Qazaqstan men Ázerbaıjan ekonomıkalyq yntymaqtastyǵy jańa deńgeıge kóterildi

BAKÝ. QazAqparat – Qazaqstan men Ázerbaıjan arasyndaǵy ekonomıkalyq yntymaqtastyq jańa deńgeıge kóterildi. Bul týraly Qazaqstan Respýblıkasynyń Ázerbaıjandaǵy Elshisi Álim Baıeldiń Ázerbaıjan Respýblıkasy Ekonomıka mınıstri Mıkaıl Djabbarovpen kezdesýinde aıtyldy, dep habarlaıdy «QazAqparat» menshikti tilshisi.

Kezdesý barysynda Álim Baıel Qazaqstan men Ázerbaıjan Memleket basshylarynyń byltyr jáne bıyl ótken ózara saparlarynyń shyn máninde ekijaqty yntymaqtastyqtyń jańa kezeńin ashqanyn atap ótti.

Dıplomat bıylǵy maýsym aıynda Qazaqstan Premer-Mınıstriniń Ázerbaıjanǵa jasaǵan resmı saparynyń nátıjeliligine de nazar aýdardy. Bul sapardyń barysynda 11 birlesken qujatqa qol qoıyldy. Atap aıtqanda, Qazaqstan, Ázerbaıjan jáne Grýzııa temir joldary arasynda birlesken kásiporyn qurý, Kaspıı teńiziniń túbimen talshyqty-optıkalyq baılanys jelisin (TOBJ) tartý boıynsha birlesken kásiporyn qurý, sondaı-aq Qazaqstan munaıyn Ázerbaıjan arqyly tasymaldaý kólemin arttyrý týraly qujattardyń mańyzy zor.

Mıkaıl Djabbarov qazirgi týrbýlentti geoekonomıkalyq jaǵdaıda Qazaqstan-Ázerbaıjan ekonomıkalyq yntymaqtastyǵyn arttyrýǵa múddeli ekendikterin rastady. Mınıstr Qazaqstanda jasalǵan temirjol lokomotıvterin Ázerbaıjanǵa jetkizý jáne Qazaqstanǵa Ázerbaıjan kemelerin jetkizý sııaqty jobalardy júzege asyrýǵa daıyn ekendikterin bildirdi. Suhbat barysynda ol Orta dálizdi (THKB) tsıfrlandyrýdyń, bir tereze qaǵıdasyna negizdelgen kólik-logıstıkalyq júıeni qurýdyń mańyzdylyǵyna nazar aýdardy. M. Djabbarov Qazaqstan men Ázerbaıjannyń Kaspıı teńizinde jáne basqa aımaqtarda munaı-gaz jobalaryna birlesip atsalysý múmkindigin qarastyrýdy usyndy. Sonymen qatar, ázerbaıjandyq mınıstr Qazaqstannyń dándi daqyldardyń senimdi óndirýshisi jáne jetkizýshisi retindegi mańyzdylyǵyn da atap ótti.

Elshi Á. Baıel Qazaqstan men Ázerbaıjan arasyndaǵy mádenı-gýmanıtarlyq jáne ekonomıkalyq yntymaqtastyqty tereńdetýge baǵyttalǵan birqatar bastama da usyndy.

Osy rette eki el arasyndaǵy saýda-ekonomıkalyq yntymaqtastyqtyń oń dınamıkasyn atap ótý qajet. Máselen, 2023 jyldyń bes aıynyń qorytyndysy boıynsha Qazaqstan men Ázerbaıjan arasyndaǵy taýar aınalymy ótken jyldyń sáıkes kezeńimen salystyrǵanda 50%-ke (162,5 mln dollardan 243,6 mln dollarǵa) ósti. 2023 jyldyń basynan beri Orta dáliz (THKB) arqyly tasymaldaý kólemi 1 mıllıon tonnadan asyp, 64%-ke ósti. Sondaı-aq, Qazaqstan Memleket basshysynyń tapsyrmasyna sáıkes ekijaqty taýar aınalymynyń jyldyq kólemin 1 mıllıard dollarǵa jetkizý úshin Ázerbaıjanǵa quny 300 mıllıon dollardan asatyn 100 taýar pozıtsııasy boıynsha ónim eksportyn arttyrýǵa daıyn. Budan basqa, osy jyldyń maýsym aıynda Qazaqstan men Ázerbaıjan arasyndaǵy ózara avıareıster lımıti aptasyna 32-den 42 reıske deıin arttyryldy.