Qazaqstan men Ázerbaıjan ekologııa jáne tabıǵı resýrstar salasyndaǵy yntymaqtastyqty damytady

ASTANA. KAZINFORM - Qazaqstannyń Ázerbaıjandaǵy elshisi Álim Baıel Ázerbaıjannyń ekologııa jáne tabıǵı resýrstar mınıstri Muhtar Babaevpen kezdesti, dep habarlaıdy Kazinform-nyń menshikti tilshisi. 

Taraptar «jasyl» dıplomatııany damytý perspektıvalaryn talqylady, jahandyq jáne óńirlik ekologııalyq kún tártibindegi ózekti máseleler boıynsha pikir almasty.

Álim Baıel Muhtar Babaevty 2024 jyldyń qarashasynda Bakýde ótetin BUU-nyń Klımattyń ózgerýi jónindegi negizdemelik konventsııasy - COP29 konferentsııasynyń 29-shy sessııasyna bıylǵy jyly tóraǵalyq etetin Ázerbaıjandy quttyqtady.

Muhtar Babaev COP29 aýqymy men qatysýshylar sany jaǵynan Ázerbaıjanda ótetin iri sharalardyń biri bolatynyn atap ótip, oǵan daıyndyq barysy týraly aıtty.

Sonymen qatar, ekijaqty kezdesý barysynda taraptar aımaqtaǵy klımattyq dıalogty qoldaýǵa baǵyttalǵan qazaqstandyq birqatar bastamalardy talqylady. Sondaı-aq taraptar janýarlardyń ártúrli túrlerin ıntrodýktsııalaý jáne reıntrodýktsııalaý salasynda yntymaqtastyq ornatýǵa kelisti.