Qazaqstan men Ázerbaıjan depýtattary TúrkPA hatshylyǵyna bardy
ASTANA. KAZINFORM — Qazaqstan men Ázerbaıjan arasyndaǵy parlamentaralyq almasý baǵdarlamasy aıasynda eki eldiń parlamentshilerinen quralǵan birlesken delegatsııa Túrki memleketteri Parlamenttik assambleıasynyń (TúrkPA) halyqaralyq hatshylyǵyna resmı saparmen bardy, dep habarlaıdy Kazinform agenttiginiń menshikti tilshisi.
Sapar barysynda delegatsııa músheleri uıymnyń Bas hatshysy, elshi Ramıl Gasanovpen kezdesti.
Ókildi delegatsııa quramynda QR Parlamenti Májilisiniń Áleýmettik-mádenı damý komıtetiniń múshesi, Shyǵys Eýropa jáne Ortalyq Azııa óńirindegi týberkýlezge qarsy kúres jónindegi Jahandyq parlamenttik kokýstyń teń tóraǵasy Gúldara Nurymova, Májilistiń Ekologııa jáne tabıǵat paıdalaný máseleleri komıtetiniń múshesi Ajar Saǵandyqova, Týberkýlezge qarsy kúres jónindegi Jahandyq kokýstyń Shyǵys Eýropa jáne Ortalyq Azııa boıynsha óńirlik menedjeri Alesıa Matýsevıch, sondaı-aq Ázerbaıjan Mıllı Májilisi depýtaty Parvana Valıevanyń kómekshisi Kamıl Gadjıev boldy.
TúrkPA Bas hatshysy Ramıl Gasanov delegatsııa múshelerin uıymnyń, onyń turaqty komıssııalary men halyqaralyq hatshylyǵynyń qazirgi qyzmetimen jan-jaqty tanystyryp, túrki álemindegi yqpaldastyq úderisterin nyǵaıtý baǵytynda júzege asyrylyp jatqan jobalarǵa erekshe toqtaldy.
Ekijaqty konsýltatsııalar barysynda taraptar densaýlyq saqtaý, ekologııa jáne ornyqty damý salalaryndaǵy parlamentaralyq yntymaqtastyqty qosa alǵanda, ózara qyzyǵýshylyq týdyratyn keń aýqymdy máseleler boıynsha pikir almasty. Kezdesýge qatysýshylar turaqty parlamenttik dıalogtyń strategııalyq mańyzyn jáne qatysýshy elderdiń zań shyǵarýshy organdary arasyndaǵy ınstıtýtsıonaldyq ózara is-qımyldy keńeıtýdiń qajettigin biraýyzdan atap ótti.
Kezdesýge sondaı-aq TúrkPA Bas hatshysynyń orynbasarlary Talǵat Ádýov pen Muhammet Alper Haıalı, Bas hatshy orynbasarynyń mindetin atqarýshy Bektur Bazakechov jáne komıssııa hatshysynyń mindetin atqarýshy Mırlan Úsenqanov qatysty.
Resmı is-shara sońynda dástúrli túrde estelik sýretke túsý rásimi ótti.
Eske salaıyq, buǵan deıin Túrki memleketteriniń Parlamenttik Assambleıasy (TúrkPA) Qazaqstanda ótken referendýmǵa qatysty óz baǵasyn berdi.
