Qazaqstan men Ázerbaıjan bul synaqtan baýyrlastyq rýhynda ótetinine senimdimin – Álim Baıel
ASTANA. KAZINFORM – Qazaqstannyń Ázerbaıjandaǵy Elshisi Álim Baıel Aqtaýda ushaq apatynan qaza tapqandardyń jaqyndaryna kóńil aıtty.
- Aqtaýdaǵy ushaq apaty týraly sýyt habardy tereń kúızelispen qabyl aldym. Qazaqstan Respýblıkasynyń Ázerbaıjan Respýblıkasyndaǵy Elshiliginiń atynan qaza tapqandardyń jaqyndaryna kóńil aıtamyn. Jandary Jánnátta bolsyn! Zardap shekkenderdiń tez saýyǵyp ketýin tileımin. Qazaqstan Prezıdenti Qasym-Jomart Toqaevtyń tapsyrmasymen ushaq apatynyń sebepterin anyqtaý jáne birinshi kezektegi kómekti kórsetý úshin Úkimettik komıssııa jumys istep jatyr, - dedi Elshi.
Ol kki eldiń quzyretti organdary birge qajetti sharalardy atqaryp jatqanyn atap ótti.
- Qazaqstannyń medıtsınalyq mekemeleri tıisti járdem kórsetip jatyr. Aqtaý qalasynyń kóptegen janashyr turǵyndary zardap shekkender úshin qan tapsyryp jatyr. Qazaqstandyqtar Ázerbaıjannyń Elshiligi men Bas konsýldyǵyna gúl shoqtaryn aparýda. Qazaqstannyń Bakýdaǵy Elshiliginde tý tómen túsirildi. Qazaqstan men Ázerbaıjan bul synaqtan baýyrlastyq pen ózara kómek rýhynda ótetinine senimdimin. Biz birgemiz..., - dedi Elshi.
Eske sala ketsek, Baký- Groznyı J2-8243 nómirli reısin oryndaǵan Embraer 190 ushaǵy Aqtaý qalasynan 3 shaqyrym jerde apatty jaǵdaıda qondy.
Oqıǵa ornyna QR Tótenshe jaǵdaılar mınıstrligi jeke quramynyń 52 adamy men 11 birlik tehnıkasy bardy.
Apatqa ushyraǵan ushaq bortynda Qazaqstannyń 6 azamaty boldy.
QR Kólik mınıstrligi málim etkendeı, Ázerbaıjan tarapynyń aldyn ala aqparaty boıynsha, bortta 62 jolaýshy men 5 ekıpaj múshesi bolǵan.
QR Prezıdentiniń tapsyrmasymen Memlekettik komıssııa quryldy.
Mańǵystaý oblysynyń densaýlyq saqtaý basqarmasy Aqtaýda Baký-Groznyı reısinde bolǵan ushaq apatynan zardap shekkender týraly aqparatty jańartty.
Memleket basshysy Ázerbaıjan Prezıdenti Ilham Álıevke kóńil aıtty.
Ázerbaıjan prezıdenti Ilham Álıev Reseı Federatsııasynyń prezıdenti Vladımır Pýtınge telefon soqty. Prezıdent Ilham Álıev telefon arqyly sóılesý barysynda AZAL jolaýshylar ushaǵynyń Aqtaýda apatqa ushyraýyna baılanysty Sankt-Peterbýrgte ótetin TMD-ǵa múshe memleketter basshylarynyń beıresmı sammıtine qatysa almaıtynyn aıtty.
Álıev Aqtaýdaǵy ushaq apaty saldarynan qaza tapqandardyń týystary men jaqyndaryna kóńil aıtty.
Sondaı-aq Sheshenstan Respýblıkasynyń basshysy Ramzan Kadyrov Aqtaý túbinde bolǵan ushaq apatynan qaza tapqandardyń týystaryna kóńil aıtty.
Úkimet komıssııasy Aqtaýdaǵy ushaq apaty ornynda jumysyn bastady.