Qazaqstan men Ázerbaıjan birlesken týroperatordy iske qosty
ASTANA. KAZINFORM — Qazaqstan men Ázerbaıjan birlesken «TýrAn» (TourAN) týroperatoryn iske qosty, dep habarlaıdy Kazinform agenttiginiń óńirdegi menshikti tilshisi.
Baký qalasynda Qazaqstan men Ázerbaıjannyń birlesken týroperatoryn resmı túrde iske qosý rásimi ótti. Joba eki el arasyndaǵy týrıstik yntymaqtastyqty damytýǵa baǵyttalǵan.
Quryltaı qujattaryna Qazaqstannyń Ázerbaıjandaǵy elshiligi ǵımaratynda qol qoıyldy.
Jańa týroperatordyń jarǵylyq kapıtaly 100 myń AQSh dollaryn quraıdy. Úlester taraptar arasynda teń bólingen. Kompanııa qyzmeti ekotýrızm, mádenı jáne gastronomııalyq týrlarmen qatar, medıtsınalyq jáne iskerlik týrızm baǵyttaryn qamtıdy.
Qazaqstannyń Ázerbaıjandaǵy elshisi Álim Baıeldiń aıtýynsha, biryńǵaı týroperator qurý ekijaqty yntymaqtastyqty nyǵaıtyp, óńirdiń halyqaralyq týrıstik tartymdylyǵyn arttyrýǵa yqpal etedi.
Onyń sózinshe, sońǵy jyldary ózara týrızm baǵytynda tájirıbe almasý jaqsy nátıje berip otyr. Mundaı bastamalar týrıster aǵynyn odan ári ulǵaıta túsedi.
Dıplomat 2024–2025 jyldary Bakýde Qazaqstan elshiliginiń uıymdastyrýymen eki qazaq-ázerbaıjan týrıstik forýmy ótkenin eske saldy. Úshinshi forým 2026 jyly Túrkistanda ótedi.
Qazirgi ýaqytta Qazaqstan men Ázerbaıjan arasynda áýe qatynasy jaqsy jolǵa qoıylǵan. Aptasyna 30-dan astam tikeleı reıs oryndalady.
«TýrAn» týroperatorynyń iske qosylýy eki eldiń týrızm salasyn damytýda mańyzdy qadam bolmaq. Sondaı-aq ınvestıtsııalyq belsendilikti arttyryp, halyqaralyq naryqqa birlesken týrıstik ónimderdi shyǵarýǵa múmkindik beredi.
Osyǵan deıin Qazaqstannyń Ázerbaıjanǵa keletin týrıster sanynyń ósýi boıynsha Ortalyq Azııa elderi arasynda kósh bastap turǵany habarlanǵan bolatyn.
