Qazaqstan men Ázerbaıjan bir jyldaǵy yntymaqtastyq nátıjelerin qorytyndylady
ASTANA. KAZINFORM — Qazaqstannyń Ázerbaıjandaǵy elshisi Álim Baıel Ázerbaıjan Prezıdentiniń kómekshisi, Prezıdent Ákimshiliginiń syrtqy saıasat máseleleri jónindegi bólim meńgerýshisi Hıkmet Gadjıevpen kezdesý ótkizdi, dep habarlaıdy Kazinform menshikti tilshisi QR-nyń Bakýdegi elshiligine silteme jasap.
Kezdesý barysynda taraptar ótken jyldaǵy ekijaqty yntymaqtastyqtyń qorytyndylaryn shyǵaryp, aldaǵy kezeńge arnalǵan basym baǵyttardy talqylady.
Álim Baıel Qazaqstan men Ázerbaıjan arasyndaǵy saıası dıalogtyń joǵary deńgeıde ekenin atap ótti. Onyń aıtýynsha, sońǵy úsh jylda Qazaqstan Prezıdenti Qasym-Jomart Toqaev Ázerbaıjanǵa alty ret saparmen barsa, Ázerbaıjan Prezıdenti Ilham Álıev Qazaqstanǵa bes ret kelgen.
Kezdesý kezinde 2025 jylǵy 8 tamyzda Ázerbaıjan men Armenııa arasyndaǵy kópjyldyq qaqtyǵystyń aıaqtalǵany erekshe atap ótildi. Taraptar beıbit retteý týraly Deklaratsııaǵa qol qoıylǵanyn, al Qazaqstan 2024 jyly ázerbaıjan-armıan kelissózderine alań usynyp, beıbit úderiske óz úlesin qosqanyn aıtty.
Sondaı-aq sońǵy 30 jylda alǵash ret Ázerbaıjan aýmaǵy arqyly Armenııaǵa jiberilgen júktiń sımvoldyq ári praktıkalyq mańyzy atap ótildi. Atalǵan júk — qazaqstandyq bıdaı boldy.
Taraptar óńirlik kommýnıkatsııalardy odan ári jandandyrýdyń mańyzdylyǵyna nazar aýdardy. Sonymen qatar 2025 jyly Qazaqstannyń qoldaýymen Ázerbaıjan Ortalyq Azııa elderi basshylarynyń sammıtteri formatyna tolyqqandy qatysýshy retinde qosylǵany aıtyldy. Buǵan deıin Qazaqstan Prezıdenti Qasym-Jomart Toqaev Ázerbaıjannyń C5+AQSh formatyndaǵy qatysýyn qoldaıtynyn málimdegen bolatyn.
Kezdesý sońynda birlesken ınvestıtsııalyq qordy paıdalana otyryp, ekonomıkalyq jáne ónerkásiptik kooperatsııany tereńdetý, sondaı-aq kólik-logıstıka jáne energetıka salalaryndaǵy yntymaqtastyqty damytý qajettigi atap ótildi.
Budan bólek, halyqaralyq jáne óńirlik kún tártibindegi ózekti máseleler, onyń ishinde Qazaqstan men Ázerbaıjannyń Eýrazııa keńistigindegi jańa geosaıası jáne geoekonomıkalyq arhıtektýrany qalyptastyrýǵa qatysýy talqylandy.
Buǵan deıin Qazaqstan men Ázerbaıjan arasynda birqatar kelisimniń bekitilgeni habarlanǵan bolatyn.
Sondaı-aq Ázerbaıjan Prezıdentiniń Qazaqstanǵa memlekettik sapary aıasynda túrli sala boıynsha 15 qujatqa qol qoıylǵany aıtylǵan.