Qazaqstan men Ázerbaıjan BAQ-tary yntymaqtastyqty nyǵaıtady
ASTANA. KAZINFORM – Qazaqstannyń Bakýdegi Elshisi Alım Baıel Ázirbaıjan Respýblıkasy Aýdıovızýaldyq keńesiniń tóraǵasy Ismet Sattarovpen kezdesti. Aýdıovızýaldyq keńes Ázerbaıjanda teleradıo habarlaryn taratý salasyndaǵy memlekettik saıasatty júzege asyrýdy jáne osy qyzmetti retteýdi qamtamasyz etedi, dep habarlaıdy Kazinform tilshisi.
Alım Baıel ekijaqty yntymaqtastyqty kórsetýde BAQ qyzmetiniń erekshe mańyzdylyǵyn atap ótti jáne Qazaqstan men Ortalyq Azııa jańalyqtaryn turaqty ári sapaly jarııalap otyrǵany úshin Ázerbaıjan tarapyna alǵysyn bildirdi. Sonymen qatar Elshi qazaqstandyq Jibek Joly telearnasyn Ázerbaıjannyń 14 kabeldik operatory arqyly retranslıatsııalaýǵa kómekteskeni úshin alǵysyn bildirdi.
Sondaı-aq dıplomat 24KZ jáne Qazaqstan International sııaqty qazaqstandyq telearnalardyń óz sıgnaldaryn Ázerbaıjan aýmaǵynda retranslıatsııalaýǵa qyzyǵýshylyq tanytqany týraly habardar etti. Sondaı-aq Qazaqstandaǵy ázerbaıjandyq CBC TV telearnasynyń habar taratýyn uıymdastyrýǵa kómektesýge daıyn ekenin bildirdi.
Óz kezeginde Ismet Sattarov Jibek Joly CNN jáne Euronews syndy batystyń tanymal telearnalarymen qatar Ázerbaıjanda osyndaı keń taraǵan Ortalyq Azııadaǵy jalǵyz telearna ekenin aıtty. Ol sondaı-aq qazaqstandyq telearnalardy Azerspace spýtnıgine qosýǵa kómektesýdi usyndy.
Sonymen qatar Elshi Álim Baıel «Balapan» telearnasynyń ónimderin Ázerbaıjanda kórsetý týraly bastama kóterdi. Ismet Sattarov qazaqstandyq anımatsııalyq fılmderdi ázerbaıjan tiline dýblıajdap, Ázerbaıjanda kórsetý úshin atalǵan eldegi jalǵyz balalar telearnasy «Gunes» kompanııasymen yntymaqtastyq ornatýǵa kómektesýge daıyn ekenin bildirdi.
Eske sala keteıik, buǵan deıin Qazaqstan men Ázerbaıjan Eýropaǵa munaı jetkizýde basty ról atqaratynyn jazǵan edik.