Qazaqstan men Ázerbaıjan arasyndaǵy taýar aınalymy 56 paıyzǵa ósti

ASTANA. QazAqparat - Ońtústik Kavkaz aımaǵynda Ázerbaıjan Respýblıkasy Qazaqstannyń mańyzdy saýda-ekonomıkalyq seriktesi. Ekijaqty tıimdi qarym-qatynasty odan ary kúsheıte túsýde qazaqstandyq-ázerbaıjandyq úkimetaralyq komıssııanyń jumysy mańyzdy bolyp otyr, dep habarlaıdy QazAqparat tilshisi.

2017 jyly komıssııa saýda-ekonomıkalyq yntymastyq boıynsha 2018-2020 jyldarǵa arnalǵan jol kartasyn qabyldaǵan bolatyn. Jol kartasynyń júzege asyrylýy eki eldiń arasyndaǵy taýar aınalymynyń aıtarlyqtaı ósimine negiz bolǵan. 2018 jyldyń alǵashqy jartyjyldyǵynda Qazaqstan men Ázerbaıjan arasyndaǵy taýar aınalymy ótken jylǵa qaraǵanda 56 paıyzǵa ósken. Tarqata aıtqanda, 2017 jyl boıy eki eldiń arasyndaǵy taýar aınalymy 142,1 mln AQSh dollary bolsa, 2018 jyldyń alǵashqy 7 aıynyń ózinde taýar aınalymy 142 mln AQSh dollaryna jetip qoıǵan. Salystyra ketsek, máselen Qazaqstan men Grýzııa arasyndaǵy taýar aınalymy 40 mln AQSh dollary bolsa, Qazaqstan men Armenııanyń arasyndaǵy taýar aınalymy bar-joǵy 6 mln AQSh dollaryn quraıdy.

Mundaı joǵary kórsetkishke eki jaqtaǵy memlekettik qurylymdardyń kúsh salýy men kásipkerleriniń belsendiligi, eki eldiń de ekonomıkanyń munaıdan tys damý dańǵylyna den qoıýy sebep bolyp otyr. Naqtyraq aıtqanda, Ázerbaıjan Astanada «Alstom» frantsýz kompanııasynyń qatysýymen ashylǵan «Elektrovozqurastyrý zaýyty» JShS zaýytynan 50 elektrovozǵa tapsyrys bergen. Óz kezeginde Ázerbaıjan Respýblıkasynyń Ekonomıka mınıstrligi Qazaqstannyń birneshe qalalarynda saýda úılerin ashýdy kózdeýde. Sebebi, jeńil ónerkásipke den qoıǵan ázerbaıjandyq kásiporyndar joǵary sapaly jáne básekege qabiletti ónimderdi shyǵaryp jatyr.

Sondaı-aq, qos tarap barlyq salamen birge, týrızmde de yntymaqtastyqty barynsha damytýǵa tyrysýda. Máselen, 20 qyrkúıek kúni Almatyda qazaqstandyq-ázerbaıjandyq týrıstik forým uıymdastyrylady. Ol jıynda ázerbaıjandyq jáne qazaqstandyq qonaq úı bıznesiniń flagmandary tanystyrylyp, eki eldiń týrıstik yntymaqtastyǵy talqylanady.