Qazaqstan men Ázerbaıjan arasyndaǵy taýar aınalymnyń áleýeti óte zor - Nazarbaev
BAKÝ. QazAqparat - Qazaqstan men Ázerbaıjan arasyndaǵy taýar aınalymynyń áleýeti óte zor. Bul týraly búgin Bakýge jasaǵan resmı sapary barysynda QR Prezıdenti Nursultan Nazarbaev málim etti, dep habarlaıdy QazAqparat.
«Resmı saparǵa shaqyrǵan Sizderge alǵys aıtamyn, biz bul kezdesýdi taǵatsyzdana kúttik jáne osyndaǵy saparymyzǵa dán rızamyz. Ázerbaıjandyq dostarymyzdyń tarapynan baýyrlastyq, dostyq, qonaqjaılyq qatynasty sezindik. Keshe keshke, búgin keńeıtilgen ortada ótken kezdesýlerde biz máselelerdiń barlyǵyn talqyladyq. Bizdiń qarym-qatynastardyń negizgi baǵyty saýda-sattyq bolyp qalatynyn atap ótkim keledi. Saýdany ulǵaıtý aıasynda basqa da qatynastardy damytý kerek», - dedi Memleket basshysy.
Onyń sózinshe, búgingi kezdesý eki el arasyndaǵy saýda-sattyqty damytý qajettigin anyqtap berdi. Sebebi 140 mln. AQSh dollary kólemindegi taýar aınalym kólemi eki memlekettiń arasyndaǵy múddege jaýap bermeıdi.
Sonymen qatar, Qazaqstan Prezıdenti birinshi orynǵa Kaspıı teńizi arqyly kóliktik-logıstıkalyq áriptestik salasy shyǵyp otyrǵandyǵyn habarlady.
«Qazaqstanda qytaılyq shekaradan bastap, Kaspıı teńizine 2000 shaqyrymdyq temirjol salyndy. «Batys Eýropa - Batys Qytaı» kólik magıstrali de júrgizildi. Olar óz nátıjelerin bere bastady. Qazirgi ýaqytta Qytaı taýaryn Kavkaz, Kaspıı teńizi arqyly Eýropaǵa jetkizý suraqtary týyndap otyr. Osy turǵyda Ázerbaıjan úshin úlken múmkindik baryn atap ótkim keledi», - dedi N. Nazarbaev.
Memleket basshysynyń pikirinshe, eki el arasyndaǵy saýda-sattyq pen taýar aınalymyn kúrt ósirý qajet.
«2020 jylǵa qaraı biz 500 mln. dollar degen meje qoıǵan bolatynbyz. Biraq mınıstrlikterdiń ózi 500 mln-ǵa kelisimshart jasasqanyn estigende, biz taýar aınalymynyń kólemin mıllıard dollarǵa jetkize alatyndyǵymyzǵa kózim jetip otyr. Soǵan talpyný kerek», - dedi Elbasy.
Sondaı-aq Prezıdent Qazaqstanda ındýstrııalandyrý baǵdarlamasy aıasynda elde elektrovoz, teplovoz, temirjol ónimderin shyǵarý jolǵa qoıylǵandyǵyn aıtty.
«Osynyń barlyǵy Ázerbaıjanǵa qajet, sondyqtan biz ony jetkizip berýge daıynbyz. Metall ónimderi - mys, shoıyn jáne taǵy sol sııaqty. Aqtaýǵa jetkizilgen Ázerbaıjan kókónisi búkil Qazaqstanǵa tarap, bir jylda onyń úlesi 12 esege artqan», - dedi Nursultan Nazarbaev.
