Qazaqstan men Ázerbaıjan arasynda dıplomatııalyq qarym-qatynas ornaǵanyna - 25 jyl
Qazaqstan men Ázerbaıjan arasyndaǵy dıplomatııalyq qarym-qatynastar 1992 jyldyń tamyz aıynan bastalady. 2004 jyly naýryz aıynda Ázerbaıjan prezıdenti Ilxam Álıevtiń Astanaǵa sapary, 2005 jyly Qazaqstan Prezıdenti Nursultan Nazarbaevtyń Ázerbaıjan eline memlekettik sapary ekijaqty qarym-qatynasqa jańa serpin bergen bolatyn.
Osy shırek ǵasyr ishinde eki el ekonomıkalyq ósý men áleýmettik-saıası turaqtylyqqa qol jetkizip, kórshilik qarym-qatynasty ustanyp keledi.
Ázerbaıjan men Qazaqstan arasyndaǵy qarym-qatynas 2005 jyly qol qoıylǵan Strategııalyq seriktestik jáne odaqtastyq qarym-qatynas týraly kelisim negizinde júzege asýda. Eki eldiń prezıdentteri udaıy ekijaqty kezdesýler ótkizip, túrli halyqaralyq alańdarda jıi kezdesip turady. Sáýir aıynyń basynda Nursultan Nazarbaevtyń Ázerbaıjanǵa resmı sapary ótti. Sapar barysynda Qazaqstan Prezıdenti Nursultan Nazarbaev Ázerbaıjan men Qazaqstan arasyndaǵy yntymaqtastyq pen dostyq qatynasty damytýǵa qosqan erekshe úlesi úshin «Geıdar Álıev» ordenimen marapattaldy.
QR Prezıdenti Nursultan Nazarbaevtyń Ázerbaıjanǵa jasaǵan resmı sapary aıasynda eki eldiń úkimetteri arasynda túrli salalar boıynsha birqatar qujattarǵa qol qoıylǵan edi. Nursultan Nazarbaev pen Ilham Álıev Qazaqstan men Ázerbaıjan memleket basshylarynyń birlesken deklaratsııasyna qol qoıdy. «QTJ» UK AQ men «ÁTJ» JAQ arasynda logıstıka men temirjol transporttyq mashına jasaý salasyndaǵy strategııalyq yntymaqtastyq týraly kelisimge qol qoıyldy. Eki eldiń syrtqy saıasat vedomstvolary 2017-2018 jyldarǵa arnalǵan yntymaqtastyq baǵdarlamasyn rásimdedi. Sonymen qatar, 1996 jyldyń 16 qyrkúıeginde tabys pen kapıtalǵa salynatyn salyqtarǵa qatysty salyq tóleýden jaltarýǵa qosarlanǵan salyq salýdyń aldyn alý jáne boldyrmaý úshin Qazaqstan men Ázerbaıjan úkimetteri arasyndaǵy konventsııaǵa ózgerister men tolyqtyrýlar engizý týraly QR jáne ÁR Úkimetteri arasyndaǵy hattamaǵa qol qoıyldy. Sonymen qatar, karantın jáne ósimdikterdi qorǵaý salasyndaǵy yntymaqtastyq pen halyqaralyq avtomobıl qatynasy týraly kelisimder rásimdeldi.
Ázerbaıjan parlamentiniń depýtaty, saıasattanýshy Rasım Mýsabekov QazAqparat tilshisine aıtýly data jaıly pikir bildire otyryp, «Qazaqstan Ázerbaıjan úshin týysqan el jáne týysqan halyq. Búgin ekijaqty dıplomatııalyq qarym-qatynas ornaǵanyna 25 jyl tolyp otyr, alaıda biz Qazaqstanmen burynnan beri dıplomatııalyq baılanysta bolǵan sekildi sezinip otyrmyn. Qazaqstan Ázerbaıjan úshin Azııa men Alys Shyǵysqa, sondaı-aq Ázerbaıjan Qazaqstan úshin Batysqa shyǵatyn qaqpa ispettes» ekendigin jetkizdi.
Belgili ázerbaıjandyq sarapshy jáne saıasattanýshy Tofık Abbasov: «Qarym-qatynastyń ornaǵanyna 25 jyl tolýy - bul tek eki eldiń ómirindegi ǵana emes, sondaı-aq bizdiń postkeńestik keńistiktiń tarıhyndaǵy, bizdiń táýelsizdigimizdiń tarıhyndaǵy mańyzdy sát bolyp tabylady, sebebi biz qıyn kezeńderdi bastan ótkerdik», - dep óz pikirimen bólisti.
Búginde bizdiń elimizde ázerbaıjandyq kapıtaldyń qatysýymen 700 kompanııa jumys istep tur. Eki el arasyndaǵy kelisimdik-quqyqtyq baza boıynsha túrli saladaǵy 60 qujatqa qol qoıylǵan. Taraptar túrli halyqaralyq uıymdar aıasynda ózara qarym-qatynas jasasýda.
