Qazaqstan men Ázerbaıjan arasynda 2022 jyly saýda aınalymy 39%-ǵa ósti

BAKÝ. QazAqparat – Qazaqstan men Ázerbaıjan arasyndaǵy taýar aınalymy 2022 jylǵy qańtar-jeltoqsanda 461,9 mln AQSh dollaryn qurady, bul ótken jyldyń sáıkes kezeńimen salystyrǵanda 39%-ǵa kóp (332,2 mln dollar), delingen QR SJRA Ulttyq statıstıka bıýrosynyń esebinde. Bul týraly QazAqparat menshikti tilshisi habarlaıdy.

Bul rette, eger Qazaqstannan Ázerbaıjanǵa eksport 2022 jylǵy qańtar-jeltoqsanda shamamen 30%-ǵa (375,3 mln.) artsa, Ońtústik Kavkaz elinen ımport 86,6 mıllıon dollardy qurap, rekordtyq 95%-ǵa joǵarylaǵan. Bul eki el arasyndaǵy saýda balansynyń jaqsarǵanyn kórsetedi.

Ázerbaıjanǵa eksport shıki munaı (74,9 mln.), bıdaı (ósimi 3,7 ese nemese 69,9 mln dollar), munaı ónimderi (3,1 ese nemese 56,8 mln dollar) jáne basqa da taýarlar jetkiziliminiń ulǵaıýy esebinen ósti. Al, arnaıy maqsattaǵy qalqymaly quraldardy jetkizý 92,7%-ǵa (120,7 mln dollar ), temir jol elektr lokomotıvteri - 60,8%-ǵa nemese 21,6 mln dollarǵa tómendegen.

Ázerbaıjannan ımporttyń ósýi elimizge qant (147,2 ese nemese 13,6 mln dollar), arnaıy maqsattaǵy qalqymaly quraldar (6,3 ese nemese 11,4 mln dollar), krýızdik ekskýrsııalyq kemeler, paromdar jáne jolaýshylardy tasymaldaýǵa arnalǵan basqa da quraldar (8,4 mln dollar), qara metaldardan jasalǵan qubyrlar (7,7 mln.) sııaqty taýarlardy ákelýdiń artýymen negizdelgen.

Sonymen qatar, ótken jyly bul elden QR-ǵa propılen polımerleri (35,4%-ǵa tómendegen nemese 5,4 mln dollar), etılen polımerleri (54,3%-ǵa nemese 3,6 mln dollar), jańǵaqtar (29,6%-ǵa nemese 1,1 mln dollarǵa) az ákelingen, al geodezııalyq nemese topografııalyq aspaptar men quraldar bizdiń elge ımporttaýdy múldem toqtatty.

Tamyz aıynda Qazaqstan Prezıdenti Qasym-Jomart Toqaev Ázerbaıjanǵa resmı saparmen bardy. Kelissózder nátıjesinde taraptar ekonomıka salasyndaǵy birqatar mańyzdy qujattarǵa qol qoıdy, sondaı-aq jaqyn arada elder arasyndaǵy ózara saýdany jylyna bir mlrd dollarǵa deıin ulǵaıtýǵa ýaǵdalasqan bolatyn.