Qazaqstan men Ázerbaıjan arasynda taǵy 2 jańa áýe baǵyty ashylady
ASTANA. KAZINFORM – Qazaqstan men Ázerbaıjan arasyndaǵy áýe qatynasy keńeıip, aldaǵy ýaqytta Aqtóbe men Atyraýdan Bakýge jańa turaqty reıster ashylady, dep habarlaıdy Kólik mınıstrligi.
Mınıstrliktiń málimetinshe, halyqaralyq áýe baǵyttarynyń geografııasyn keńeıtý jáne qoldanystaǵy reısterdiń jıiligin arttyrý jumystary jalǵasyp jatyr.
– Bıylǵy 16 maýsymnan bastap AZAL áýe kompanııasy Shymkent – Baký baǵyty boıynsha aptasyna 3 ret turaqty reısterdi oryndaı bastady. Sonyń nátıjesinde Qazaqstan men Ázerbaıjan arasyndaǵy aptalyq reıster sany 30-dan 33-ke deıin artty, – delingen habarlamada.
Sonymen qatar, áýe kompanııasy Aqtóbe – Baký baǵyty boıynsha aptasyna 3 ret jáne Atyraý – Baký baǵyty boıynsha aptasyna 4 ret turaqty reıster ashýdy josparlap otyr.
Mınıstrliktiń málimetinshe, jańa baǵyttardyń iske qosylýy Qazaqstan men Ázerbaıjan arasyndaǵy saýda-ekonomıkalyq, iskerlik jáne týrıstik yntymaqtastyqty odan ári damytýǵa múmkindik beredi.
Aıta keteıik, tamyzdan bastap Astana – Ankara baǵytyndaǵy ushaq kún saıyn qatynaıdy.
