Qazaqstan men Ázerbaıjan Alıat portynda ıntermodaldy termınal salady
ASTANA. KAZINFORM — Qazaqstan men Ázerbaıjan Alıat portynda birlesken ıntermodaldy termınal salýdy josparlap otyr. Bul týraly Qazaqstannyń Ázerbaıjandaǵy Elshisi Álim Baıeldiń Ázerbaıjannyń kólik-kommýnıkatsııa holdınginiń (AZCON) atqarýshy dırektory Shahın Babaevpen kezdesýinde belgili boldy, dep habarlaıdy Kazinform agenttiginiń Bakýdegi menshikti tilshisi.
Kezdesý barysynda taraptar kólik-logıstıka salasyndaǵy ekijaqty yntymaqtastyqtyń qazirgi jaı-kúıi men damý perspektıvalaryn, sondaı-aq kólik baılanysyn keńeıtý jáne Transkaspıı halyqaralyq kólik baǵytynyń ótkizý qabiletin arttyrý máselelerin talqylady.
Qazaqstan Elshisi 2024 jyly memleket basshylarynyń qatysýymen Alıat portynda birlesken ıntermodaldy termınal salý jóninde kelisimge qol jetkizilgenin eske saldy. Ázerbaıjan tarapynyń málimetinshe, qazir Baký portynyń damý jónindegi bas jospary jańartylyp jatyr. Osy jumys aıaqtalǵannan keıin termınal qurylysy bastalady dep kútilýde.
Kezdesýde kólik ónimderin ózara jetkizý týraly ýaǵdalastyqtardyń oryndalýyna da erekshe nazar aýdaryldy. Qazaqstan Ázerbaıjanda jasalǵan kemelerdi satyp alýdy josparlap otyr. Al Ázerbaıjan Qazaqstanda óndirilgen lokomotıvterdi satyp alýdy jalǵastyrady.
Osy kelisim aıasynda Qazaqstan Baký keme jasaý zaýytyna eki qurǵaq júk kemesin salýǵa tapsyrys berip úlgerdi. Óz kezeginde AZCON basshysy jýyq arada qazaqstandyq lokomotıvterdi satyp alý múmkindigin qarastyrýǵa daıyn ekenin jetkizdi.
Aıta keteıik, 2015–2022 jyldary Qazaqstan Ázerbaıjanǵa 50 lokomotıv jetkizgen.
Kezdesý qorytyndysynda taraptar eki eldiń kólik-kommýnıkatsııalyq áleýetin odan ári damytýǵa jáne olardyń Eýrazııadaǵy negizgi tranzıttik toraptar retindegi rólin kúsheıtýge múddeli ekenin rastady.
Aıta ketelik 2027 jyldan bastap Qazaqstan men Ázerbaıjan e-Permit júıesine tolyq kóshedi.
