Qazaqstan men Ázerbaıjan Alakólde shıpajaı keshenin salady
ASTANA.KAZINFORM - Qazaqstannyń Ázerbaıjandaǵy Elshisi Álim Baıel Ázerbaıjannyń Ekonomıka mınıstri Mıkaıl Djabbarovpen kezdesti, dep habarlaıdy Kazinform tilshisi.
Taraptar saýda-ekonomıkalyq, ınvestıtsııalyq, kólik-logıstıka, energetıka jáne qurylys salalaryndaǵy ekijaqty yntymaqtastyqtyń qazirgi jaǵdaıy men bolashaǵyn talqylady.
Álim Baıel ekijaqty taýar aınalymynyń jalǵasyp kele jatqanyn atap ótti. Bıylǵy tórt aıda ósim 20 paıyz boldy. Ásirese, 2025 jyly Qazaqstan alǵash ret Ázerbaıjanǵa bıdaıdyń negizgi jetkizýshisi bolyp, Ázerbaıjannyń astyq ımportynyń 88 paıyzyn qamtamasyz etkeni qýantady.
Óz kezeginde Mıkaıl Djabbarov Qazaqstanmen ekonomıkalyq yntymaqtastyqty damytý Ázerbaıjan úshin strategııalyq mańyzdy ekenin atap ótti. Bul turǵyda ol Transkaspıı halyqaralyq kólik joly (TIR), Kaspıı teńiziniń túbimen talshyqty-optıkalyq baılanys jelisin (TOBJ) tartý, Qazaqstannyń energetıkalyq resýrstarynyń Ázerbaıjan aýmaǵy arqyly tranzıttik ótýi, sondaı-aq teńiz túbi úshin úlken mańyzy bar tereń teńiz elektr kabelin tartý týraly kelisim sııaqty aımaqtaǵy iri birlesken jobalardyń iske asyrylýyn joǵary baǵalady.
Elshi Álim Baıel ázerbaıjandyq mınıstrge Qazaqstan basshylyǵynyń Ázerbaıjanmen óndiristik kooperatsııany damytýǵa erekshe kóńil bóletinin habarlady. Osy turǵyda ol Qazaqstanda ınfýzııalyq eritindilerdiń birlesken óndirisin qurýdy usyndy.
Sondaı-aq Álim Baıel Ázerbaıjan tarapyna Alakól kóliniń jaǵasynda saýyqtyrý keshenin salýdy usyndy. Mıkaıl Djabbarov bul bastama boıynsha yntymaqtastyqqa daıyn ekenin bildirdi. Taraptar olardy júzege asyrýdyń egjeı-tegjeıin talqylady.
Sondaı-aq taraptar turǵyn úıler men áleýmettik nysandardy salýdaǵy qurylys kompanııalarynyń qyzmetin odan ári keńeıtý máselelerin talqylady. Birqatar qazaqstandyq kompanııalardyń Ázerbaıjanda medıtsınalyq mekemeler men turǵyn úıler salýǵa kiriskeni atalyp ótti.
Kaspııde Qazaqstan men Ázerbaıjannyń áskerı teńiz kúshteri jattyǵyp jatqanyn jazǵan bolatynbyz.