Qazaqstan men Ázerbaıjan Alakólde sanatorıı salady
ASTANA. KAZINFORM — Búgin elordada ótken Qazaqstan-Ázerbaıjan bıznes forýmynda eki eldiń kompanııalary arasynda 16 kelisimge qol qoıyldy.
— Eki el Prezıdentteriniń kezdesýi aıasynda osy forýmdy uıymdastyrýdy jón kórdik. Onyń aıasynda 16 kelisim men memorandýmǵa qol qoıyldy. Qujattar ІT-tehnologııalar, bilim syndy ártúrli baǵyttardy qamtıdy. Alakóldiń Shyǵys Qazaqstan jaǵynda «Alakól» sanatorııin birigip salý da josparda bar. Al saýda-sattyqqa qatysty 1-2 kelisim ǵana rásimdeldi. Bireýi «Istısý» mıneraldy sýyn jetkizý. Qazir Ázerbaıjanda qaıta qalpyna keltirilgen zaýytta «Istısý» sýlary shyǵarylyp jatyr. Sony bizge jetkizedi. Oǵan QazTrade kompanııasy kómek kórsetedi. Osy ne kelesi aptada bul sýsyndardy elimizdiń dúkenderiniń sórelerinen kórip qalasyzdar, — dedi is-shara aıasynda BAQ ókilderine suhbat bergen Saýda jáne ıntegratsııa vıtse-mınıstri Aıdar Ábildabekov.
Osy rette vıtse-mınıstr atalǵan zaýyt tarıhy da erekshe ekenin aıtty.
— Armenııadan qaıtaryp alǵan jerlerindegi zaýytta armıandar qaınar bulaq kózin betondap bitep ketken eken. Buǵan Ázerbaıjan Prezıdenti namystanyp, zaýytty quzyryna alyp qaıta qalpyna keltiripti. Germanııadan qural-jabdyq ákelip, jańadan qudyqtar qazdyrypty. Qazir bótelkege quıyp shyǵaryp jatyr, — dedi ol.
Aıta keteıik, osy jyldyń qańtar-tamyzynda ózara saýda-sattyq kólemi 343,3 mln dollar boldy. Bul rette Qazaqstan ımporty 290,8 mln dollarǵa jetip, Ázerbaıjan eksporty 58 paıyzdan astamǵa artty.