Qazaqstan men Ázerbaıjan 2-3 jylda saýda aınalymyn ósirýge nıetti
BAKÝ. QazAqparat - Qazaqstan Prezıdenti Nursultan Nazarbaevtyń Ázerbaıjanǵa jasaǵan resmı sapary barysynda memleket basshylarynyń keńeıtilgen quramdaǵy kelissózderi ótti, dep habarlaıdy «QazAqparat» HAA tilshisi.
«Eń aldymen, sizdiń elińizge kópten kútken sapardy jasaýǵa shaqyrǵanyńyz úshin úlken alǵysymdy bildiremin. Biz ázerbaıjandyq baýyrlarymyzdyń tarapynan jylylyq, qonaqjaılylyq sezinýdemiz. Qol qoıylatyn bes memleketaralyq qujat, sondaı-aq vedomstvoaralyq kelisimder ázirlendi. Olar sońǵy jyldardaǵy bizdiń qatynasymyzdyń jańa kezeńi bolyp tabylady, eki el arasyndaǵy ekonomıkalyq, qarjylyq yntymaqtastyq málelerin sheshedi. Biz shyn máninde barlyq máselelerdi, sonyń ishinde qol qoıýǵa daıyndalǵan dekloratsııany talqyladyq. Biz aldaǵy eki-úsh jylda saýda aınalymyn birneshe esege joǵarylatýǵa múmkindiktiń bar ekendigin anyqtadyq», - dep atap ótti Nursultan Nazarbaev.
Prezıdent, sondaı-aq, mádenıet salasyndaǵy qarym-qatynasty nyǵaıtýdyń qajettiligin atap ótti.
«Bizge jastardy memleketimizdegi tıisti bilim ordalaryna qabyldaý úshin, mádenı qatynasty, zııaly qaýym ókilderiniń kezdesýin, mádenı kúnderdi jańǵyrtý úshin mádenı-gýmanıtarlyq sharalardy basty nazarǵa alýymyz kerek(...) Jaqsy múmkindik bar - ol «kópir» - 130 myń etnıkalyq ázerbaıjandyqtar, Qazaqstanda turyp jatqan azamattarymyz. Bizdiń saýdamyzdaǵy jaqsy kópir bolyp tabylady. Men olardyń birikken kásiporyndar ashyp, kásipkerlikpen aınalysyp jatqandyǵyn jáne bizdiń qatynasymyzdy jaqsartýǵa atsalysyp jatqandyǵyn bilemin», - dedi Qazaqstan Prezıdenti. 
Keńeıtilgen kezdesý barysynda Ázerbaıjan prezıdenti Qazaqstandy BUU Qaýipsizdik keńesine QR-nyń saılanǵandyǵymen quttyqtady.
«Bul álemdik isterdegi Qazaqstan róliniń moıyndalǵandyǵyn bildirip, Sizdiń jeke abyroıyńyz ben tek bizdiń aýmaqta emes, sondaı-aq jer sharyndaǵy beıbitshilikti nyǵaıtý úshin kóterip júrgen bastamalaryńyzdyń arqasy dep bilemin», - dedi Ilham Álıev.
«Bizdiń qarym-qatynasymyzdyń damyp jatqandyǵyna dán rızamyn, árdaıym baılanysyp otyrmyz. Búgin kóptegen máseleler tóńireginde pikir almastyq. Osy pikir almasý kórsetkendeı, barlyq máseleler boıynsha ustanymdarymyz tolyqtaı sáıkes kelýde. Saıası yntymaqtastyǵymyz belsendi, ekonomıka, kólik salasyndaǵy bolashaǵymyz jarqyn. Biz buny keńinen talqyladyq jáne qazir delegatsııa quramymen dıskýssııany jalǵastyramyz», - dedi Ázerbaıjan basshysy.
«Búgin qysqa merzimde qabyldanatyn sheshimimizdiń saýda aınalymyn aıtarlyqtaı ulǵaıtýǵa, sondaı-aq óńirlik yntymaqtastyq salasynda jańa jaǵdaı qurýǵa septigin tıgizetinine senimdimin. Qazaqstan da, Ázerbaıjan da naqty jobalar men transporttyq, energetıkalyq salalar arqyly óńirlik yntymaqtastyqty nyǵaıtýǵa bar kúsh-jigerin jumsaýda. Sonymen qatar, eki eldiń kompanııalary arasyndaǵy ózara ınvestıtsııalyq qatynastardyń bastalyp, jaqsy nátıje berip jatqandyǵy meni qýantty. Sizdiń saparyńyz men qabyldanatyn sheshimder ınvestıtsııa kólemin arttyrý arqyly jeke sektordy da yntalandyrady dep úmittenemin», - dep atap ótti Ilham Álıev.
