Qazaqstan men Avstrııa qylmyspen kúreste yntymaqtasa áreket etetin boldy
QR SІM baspasóz qyzmetiniń málimetinshe, atalǵan qujatta qylmysqa qarsy kúres salasynda ózara is-qımyldy damytýǵa erekshe mán berilgen. Sondaı-aq Avstrııa Qazaqstannyń quqyqtyq kómek salasynda Eýropa Keńesiniń Konventsııalaryna qosylý nıetin qoldaýǵa daıyn ekenin bildirdi. Avstrııa mınıstriniń aıtýynsha, qol qoıylǵan qujat «Eýropa Odaǵynda Avstrııanyń aǵymdaǵy tóraǵalyǵyn eskere otyryp, QR-nyń Eýropa Keńesi baǵyty boıynsha jasaǵan mańyzdy qadamy jáne quqyq salasynda ekijaqty yntymaqtastyqty odan ári damytýdyń negizgi tarmaǵy bolyp tabylady».
Ekijaqty kelissóz barysynda qylmystyq sot tóreligi salasyndaǵy ekijaqty kelisimderdi daıyndaý jáne Qazaqstannyń Eýropa Keńesiniń Konventsııalaryna qosylýyn birge alǵanda, quqyq salasynda ózara is-qımyldy damytýdyń ózekti máseleleri talqylandy. Bul rette I.Mozer elimizdiń quqyq júıesin reformalaýdaǵy qadamdaryn joǵary baǵalady. Kezdesý jáne onyń qorytyndysy boıynsha qol qoıylǵan qujat Avstrııada «tynysh aılaq» tapqan qylmyskerlerge mańyzdy eskertý boldy.
Sonymen qatar, Qazaqstan delegatsııasy 2018 jyly 15-19 qazan aralyǵynda BUU Vena bólimshesinde ótip jatqan BUU transulttyq uıymdasqan qylmysqa qarsy konventsııasyna (TUQK) qatysýshy memleketter konferentsııasynyń 9-shy sessııasyna qatysty.
Sessııada transulttyq uıymdasqan qylmysqa qarsy kúreste ulttyq zańnamalardy jańǵyrtý, ózara quqyq kómegi, ekstradıtsııalaý, polıtsııa jáne qadaǵalaýshy organdar arasynda yntymaqtastyq ornatý úshin jańa quqyq normalaryn qabyldaý, sondaı-aq quqyq qorǵaý organdarynyń qyzmetkerleriniń quzyretin arttyrýda tehnıkalyq járdem kórsetý jáne trenıngter ótkizý máseleleri qaraldy.
Qazaqstan delegatsııasy óz sózinde, Prezıdent Nursultan Nazarbaevtyń 2018 jyly 10 qańtardaǵy jáne 5 qazandaǵy Qazaqstan halqyna Joldaýlarynda qoıǵan mindetterin oryndaý maqsatynda quqyq qorǵaý qyzmetin jetildirý, onyń tıimdiligin arttyrý, qylmystyq protseste azamattardyń quqyqtaryn qorǵaý máselelerine qatysty júrgizilip jatqan zańnamalardy reformalaý boıynsha elimizdiń jetistikteri týraly habarlady.
Konferentsııaǵa qatysýshylar transulttyq uıymdasqan qylmysqa qarsy kúres boıynsha elimizde qabyldanyp jatqan sharalar týraly aqparat aldy. Sondaı-aq, osy qaterge qarsy kúreste halyqaralyq yntymaqtastyqty jandandyrýdyń mańyzdylyǵy atap ótildi.
Anyqtama: 2000 jyldyń jeltoqsanynda Palermo qalasynda (Italııa) transulttyq uıymdasqan qylmysqa qarsy BUU Konventsııasyna qol qoıý úshin joǵary deńgeıde konferentsııa ótti. Konventsııa kelesi qaýipti áreketterdi qylmysqa jatqyzady: qylmystyq kiristerdi jylystatý, uıymdasqan qylmystyq topqa qatysý jáne sot tóreligin júzege asyrýǵa kedergi jasaý.
Ádette, Vena qalasynda eki jylda bir ret, BUU transulttyq uıymdasqan qylmysqa qarsy konventsııasyna qatysýshy memleketterdiń konferentsııasy ótkiziledi jáne onyń barysynda qatysýshy memleketter TUQK ımplementatsııalaý máselelerin talqylaıdy.
Qazaqstan Konventsııaǵa 2008 jyly shilde aıynda qosyldy. 2018 jyldyń qyrkúıegine deıin osy qujatqa BUU-ǵa múshe 189 memleket qol qoıdy.
