Qazaqstan men Aýstrııa saýda-ekonomıkalyq yntymaqtastyqty keńeıtpek

ASTANA. KAZINFORM – Qazaqstan Respýblıkasy Premer-mınıstriniń birinshi orynbasary Roman Sklıar aýstrııalyq isker toptarynyń ókildi delegasııasymen kelgen Aýstrııa Respýblıkasy Federaldyq Parlamenti Ulttyq keńesiniń ekinshi prezıdenti Peter Haýbnermen kezdesti.

Taraptar saıası, ekonomıkalyq jáne mádenı-gýmanıtarlyq salalardaǵy Qazaqstan-Aýstrııa qarym-qatynastaryn odan ári jan-jaqty damytýdyń mańyzdylyǵyn atap ótip, ekijaqty yqpaldastyq boıynsha pikir almasty.

Eki el arasyndaǵy ekonomıkalyq, aýyl sharýashylyǵy, ekologııalyq, ónerkásiptik, tehnıkalyq jáne tehnologııalyq yntymaqtastyq jónindegi úkimetaralyq komıssııanyń, sondaı-aq saýda-ınvestıtsııalyq áriptestikti nyǵaıtýdaǵy Іskerlik keńestiń sheshýshi róli atap ótildi.

Osy turǵyda R.Sklıar energetıka, mashına jasaý, agroónerkásiptik keshen, ınfraqurylym salalaryndaǵy baılanystardy tereńdetý áleýetine erekshe nazar aýdardy.

Óz kezeginde Aýstrııa Federaldyq Parlamenti Ulttyq keńesiniń ekinshi prezıdenti Aýstrııa men Qazaqstan arasyndaǵy ózara is-qımyldyń joǵary serpinin saqtaýǵa múddelilik tanytty.

Premer-mınıstrdiń birinshi orynbasary aýstrııalyq delegatsııany elimizdegi júrgizilip jatqan reformalar, Eýropa Odaǵymen qatynastardy keńeıtý, ekonomıkany ártaraptandyrý boıynsha naqty qadamdar, sondaı-aq Qazaqstanǵa sheteldik ınvestıtsııalardy tartý jáne bıznes júrgizý úshin qolaıly jaǵdaılar jasaý týraly habardar etti.

R.Sklıar ekijaqty áriptestiktiń joǵary deńgeıin jáne iri aýstrııalyq kompanııalardyń qazaqstandyq naryqtaǵy tabysty tájirıbesin atap ótip, eki el arasyndaǵy iskerlik belsendilikti keńeıtýge shaqyrdy.

Kezdesý sońynda taraptar ózara tıimdi yntymaqtastyqty nyǵaıtýǵa beıil ekendikterin rastady.

Aıta keteıik, tórt jańa taýar tobyna mindetti tańbalaý engiziledi.