Qazaqstan men Aýstrııa: saýda, aýyl sharýashylyǵy jáne kólik salasyndaǵy máseleler qaraldy
ASTANA. KAZINFORM — Astanaǵa jumys saparymen kelgen Aýstrııa Respýblıkasy Federaldy Jınalysynyń Ulttyq keńesi tóraǵasynyń orynbasary Peter Haýbner Májiliske keldi. Palata spıkeri Erlan Qoshanovpen kezdesýde taraptar parlamentaralyq baılanysty nyǵaıtý joldaryn talqylady.
Mártebeli meımandy qarsy alǵan Májilis tóraǵasy Vena Astananyń Eýropadaǵy mańyzdy seriktesi ekenin, al eki eldiń parlamentshileri saıası dıalogty nyǵaıtýǵa belsene atsalysyp júrgenin atap ótti.
— Memleket basshysy Qasym-Jomart Kemeluly Toqaev Aýstrııamen tıimdi ári ártarapty yntymaqtastyqty damytýǵa úlken mán beredi. Osy oraıda, Parlamenttik dıplomatııa jelisi boıynsha aýqymdy jumys júrgizilip jatyr. Bıyl qyrkúıek aıynda biz Aýstrııa Ulttyq Keńesi men Aýylsharýashylyq klasteri delegatsııasyn qabyldadyq. Búgin sizdermen júzdesip otyrmyz. Bir-birimizdi jaqsyraq tanýǵa jáne qarym-qatynas ornatýǵa degen talpynysymyz — eki halyq arasyndaǵy sapaly yntymaqtastyqtyń kepili, — dedi Erlan Qoshanov.
Májilis spıkeri meımanǵa elimizde júrip jatqan reformalar men ekonomıkanyń turaqty damýyn qamtamasyz etý baǵytyndaǵy zań shyǵarý jumysy týraly aıtyp berdi. Atap aıtqanda, jańa Bıýdjet, Salyq, Sý jáne Qurylys kodeksterine, kreatıv ındýstrııalardy damytý, jer qoınaýyn paıdalaný máseleleri jónindegi zań jobalaryna jáne taǵy basqa qujattarǵa toqtalyp ótti. Depýtattardyń aldaǵy úsh jylda Qazaqstandy tolyq tsıfrlyq memleketke aınaldyrý týraly Prezıdent tapsyrmasyn iske asyrýǵa qatysty jumysyna erekshe nazar aýdaryldy.
Óz kezeginde Peter Haýbner eki el arasyndaǵy berik qarym-qatynastyń kepili bolatyn parlamentaralyq dıalogty jan-jaqty nyǵaıtýdyń mańyzdylyǵyn atap ótti. Ol tsıfrlandyrý salasynda jáne osy baǵyttaǵy eń ozyq jobalardy engizý boıynsha Qazaqstan men Aýstrııa arasynda tájirıbe almasý múmkindikteri zor ekenin aıtty. Sonymen qatar aýstrııalyq kásipkerler Qazaqstanmen yntymaqtastyq aıasyn keńeıtýge úlken qyzyǵýshylyq tanytyp otyrǵanyna, depýtattar óz tarapynan buǵan úlken qoldaý kórsete alatynyna nazar aýdardy.
Áńgime barysynda taraptar dostyq toptary, salalyq komıtetter men apparattar arasyndaǵy ortaq jumysty kúsheıtý jóninde pikir almasty. Sondaı-aq, Parlamentaralyq Odaq, EQYU Parlamenttik Assambleıasy jáne Eýropa Keńesi aıasynda ózara is-áreketti nyǵaıtý joldaryn talqylady.
Depýtattar saýda, mashına jasaý, aýyl sharýashylyǵy, kólik-logıstıka jáne basqa da máseleler boıynsha eki eldiń yntymaqtastyǵyn damytýǵa jan-jaqty yqpal etýge ýaǵdalasty.
Aıta ketelik Qazaqstan men Aýstrııa saýda-ekonomıkalyq yntymaqtastyqty keńeıtpek.