Qazaqstan men Aýstrııa ókilderi ekijaqty yntymaqtastyqtyń perspektıvalaryn talqylady
ASTANA. QazAqparat - Qazaqstan men Aýstrııa jan-jaqty saıası yntymaqtastyqty damytýǵa, saýda-ekonomıkalyq baılanystardyń áleýetin tolyǵymen iske asyrýǵa, sondaı-aq halyqaralyq deńgeıde tyǵyz jumys isteýge nıetti.
Astanada ótken eki eldiń syrtqysaıası vedomstvolary arasyndaǵy saıası konsýltatsııalardyń negizgi oı ózegi boldy, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.
Sol kúni QR Syrtqy ister mınıstri Beıbit Atamqulov Syrtqy ister mınıstriniń birinshi orynbasary - Aýstrııa Respýblıkasynyń Eýropa, ıntegratsııa jáne syrtqy ister Federaldyq mınıstrliginiń Bas hatshysy Iohannes Peterlık basqarǵan aýstrııalyq delegatsııany qabyldady.
Suhbattastar saıası, ekonomıkalyq jáne mádenı-gýmanıtarlyq yntymaqtastyqtyń keń aýqymdy máselelerin talqylap, uzaq merzimdi yntymaqtastyqty odan ári keńeıtýge degen ózara qyzyǵýshylyqtaryn taǵy da rastady.
Qazaqstan tarapy Aýstrııamen senimdilikke negizdelgen saıası dıalogty keńeıtýge qyzyǵýshylyq bildirdi. Aýstrııanyń Syrtqy ister mınıstri Karın Knaısseldiń Qazaqstanǵa josparlanǵan sapary ekijaqty saıası yntymaqtastyqty tereńdetýge kózdelgen mindetterge saı keledi. Qazaqstan Respýblıkasy Parlament Májilisiniń Tóraǵasy Nurlan Nyǵmatýllınniń Aýstrııaǵa aqpandaǵy sapary parlamentaralyq baılanystyń jemistiligin rastaıdy.
Kelissózderdiń basty taqyryby syrtqy saıasattyń ekonomıkalyq quramdas bóligin kúsheıtý mindetteriniń sheńberinde Qazaqstan men Aýstrııanyń Syrtqy ister mınıstrlikteri arasyndaǵy yntymaqtastyqty jandandyrý boldy.
«Memleket basshysynyń Syrtqy ister mınıstrliginiń aldyna qoıǵan basty mindetterdiń biri - bizdiń elge ınvestıtsııalar men jańa tehnologııalardy tartý bolyp tabylady», - dedi B. Atamqulov kezdesýde.
Ekijaqty yntymaqtastyqtyń keleshegin talqylaý barysynda Aýstrııa tarapy aýyl sharýashylyǵy kesheni, jasyl jáne tsıfrlyq ekonomıka, ónerkásip jáne ınfraqurylymdy damytý salasyndaǵy jobalardy birlesip iske asyrýǵa Qazaqstannyń qyzyǵýshylyǵy bar ekeninen habardar boldy.
Búgingi tańda Qazaqstanda aýstrııalyq kapıtaldyń qatysýymen 50-ge jýyq kásiporyndar jumys isteıdi. 2005 jyldan beri qazaqstandyq ekonomıkaǵa salynǵan aýstrııalyq ınvestıtsııalar 5,7 mlrd. AQSh dollardan astam somany qurady.
Suhbattastar jańa ınvestıtsııalyq jobalardy júzege asyrý boıynsha odan da belsendirek birlesken jumystardy júrgizý jáne ekijaqty saýdany ulǵaıtý múmkindikterin izdestirý týraly kelisti.
«Energııa tıimdiligi, jasyl ekonomıka jáne jalpy saýda-sattyqty keńeıtý salasyndaǵy ekijaqty qarym-qatynastardy nyǵaıtý - ekijaqty kún tártibiniń orta jáne uzaq merzimdi keleshektegi basym mindetteri bolyp tabylady», - dedi I. Peterlık.
Sonymen qatar, ózekti aımaqtyq jáne halyqaralyq máseleler talqylandy, atap aıtqanda Ortalyq Azııadaǵy aımaqtyq yntymaqtastyq perspektıvasy, «Beldeý men jol» atty Qytaı bastamasy sheńberindegi yntymaqtastyq, Aýǵanstandaǵy jaǵdaıdy turaqtandyrýǵa kómektesý, zańsyz mıgratsııamen kúres jáne basqa da kún tártibindegi máseleler.
Syrtqy ister mınıstri suhbattasyn Elbasynyń eýrazııalyq keńistigindegi keshendi yntymaqtastyqty qamtamasyz etýge baǵyttalǵan negizgi bitimgerlik bastamalarymen tanystyrdy, atap aıtqanda Helsınkı qorytyndy aktisin qabyldaýdyń 45-jyldyǵyna arnalǵan 2020 jyly Astanada Qaýipsizdik jáne yntymaqtastyq boıynsha halyqaralyq konferentsııa ótkizý týraly tanystyrdy.
Halyqaralyq qaýipsizdikti nyǵaıtýdaǵy Qazaqstannyń jigerin ataı otyryp, suhbattastar Elbasynyń AQSh-RF-QHR-EO basshylarynyń kezdesýin ótkizý týraly bastamasynyń ózektiligin atap ótti.
Taraptar Eýropalyq Odaq - Ortalyq Azııa formatynda syndarly jáne senimdi dıalogty damytýdyń mańyzdylyǵyn rastady. Mınıstr Qazaqstannyń EO-men aımaqtyq formatta yntymaqtastyqty alǵa jyljytýdyń belsendi jaqtaýshysy ekenin ataı otyryp, 2019 jyldyń birinshi jartysynda qabyldanýy josparlanyp otyrǵan Ortalyq Azııa boıynsha Eýropalyq Odaqtyń bolashaq jańa strategııasyna aıryqsha mán beretinin atap ótti.
