Qazaqstan men Aýstrııa dıplomattardy vızalyq talaptardan bosatpaq
ASTANA. KAZINFORM — Qazaqstan Úkimeti men Aýstrııa Úkimeti arasyndaǵy dıplomatııalyq pasporttardyń ıelerin vızalyq talaptardan bosatý týraly kelisim bekitilmek. Úkimettiń tıisti qaýlysy ashyq NQA portalynda jarııalandy.
Qujatqa sáıkes, Qazaqstan Respýblıkasynyń azamattary — jaramdy dıplomatııalyq pasporttardyń ıeleri Aýstrııa Respýblıkasynyń aýmaǵyna nemese 1985 jylǵy 14 maýsymdaǵy jalpy shekaralarda tekserýlerdi birtindep alyp tastaý týraly 1990 jylǵy 19 maýsymdaǵy Shengen kelisimin qoldaný týraly Konventsııaǵa qol qoıǵan kez kelgen eldiń aýmaǵyna kirgen kezden bastap esepteletin 180 (júz seksen) kún ishinde 90 (toqsan) kúnnen aspaıtyn merzimge, sondaı-aq dál osyndaı sharttarmen Aýstrııa azamattary vıza alý talabynan bosatylady.
Qazaqstan Respýblıkasy men Aýstrııa Respýblıkasynyń jaramdy dıplomatııalyq pasporttarynyń ıeleri jaýapty ımmıgratsııalyq bılik oryndary aıqyndaǵan kezde ótkizý pýnktteri arqyly ekinshi taraptyń aýmaǵyna kire alady jáne shyǵa alady. Sonymen qatar, olarǵa qaýipsizdik, ımmıgratsııalyq, kedendik, sanıtarlyq jáne basqa da normalarmen baılanysty jáne osyndaı jaramdy pasporttardyń ıelerine zańdy túrde qoldanylatyn shekteýlerden ózge qandaı da bir shekteýler qoıylmaıdy.
Taraptar osy kelisimge qol qoıylǵan sátten bastap 30 (otyz) kún ishinde dıplomatııalyq arnalar arqyly osy kelisimniń 1-babyna sáıkes, tıisti tarap paıdalanatyn pasporttardyń úlgilerimen almasady. Árbir tarap ekinshi tarapqa jańadan qoldanysqa engen nemese ózgertilgen dıplomatııalyq pasporttyń úlgilerin olar kúshine engenge deıin keminde 30 (otyz) kún buryn usynýǵa mindetti.
Qujat 28 sáýirge deıin qoǵamdyq talqylaýǵa shyǵarylyp otyr.
Buǵan deıin Aýstrııanyń úsh partııaly koalıtsııasy bosqyndardyń otbasyn qaıta biriktirý protsesin dereý toqtatý týraly sheshim qabyldaǵanyn jazǵan edik.