Qazaqstan men Aýstrııa dıplomatııalyq pasport ıelerin vızalyq talaptardan bosatpaq
ASTANA. KAZINFORM – Ashyq NQA portalynda Qazaqstan men Aýstrııa Federaldy Úkimetteri arasyndaǵy dıplomatııalyq pasporttardyń ıelerin vızalyq talaptardan bosatý týraly kelisim jobasy jarııalandy.
Kelisim rásimdelgennen keıin Qazaqstan Respýblıkasynyń azamattary - qoldanystaǵy dıplomatııalyq pasporttardyń ıeleri Aýstrııa Respýblıkasynyń aýmaǵyna vızasyz kire alady jáne onda 180 (júz seksen) kún merzimi ishinde 90 (toqsan) kúnge deıin bola alady. Aýstrııalyq dıplomatııalyq pasport ıelerine de dál osyndaı múmkindik beriledi.
Qazaqstan Respýblıkasynyń men Aýstrııa Respýblıkasynyń qoldanystaǵy dıplomatııalyq pasporttarynyń ıeleri jaýapty ımmıgratsııalyq bılik oryndary aıqyndaǵan ótkizý pýnktteri arqyly ekinshi taraptyń aýmaǵyna kirip-shyǵa alady. Sonymen qatar olarǵa qaýipsizdik ımmıgratsııalyq, kedendik, medıtsınalyq jáne basqa da quqyqtyq normalarmen baılanysty jáne osyndaı qoldanystaǵy pasporttardyń ıelerine zańdy túrde qoldanylatyn shekteýlerden ózge qandaı da bir shekteýler qoıylmaıdy.
Kelisim joba 6 naýryzǵa deıin qoǵamdyq talqylaýǵa shyǵarylyp otyr.
Buǵan deıin Kazinform tilshisi Qazaqstan tólqujatynyń qaýqaryn saralap, qaı elmen qatynasta kádege jaraıtynyn zerttep kórgen edi.