Qazaqstan men Aýǵanstanmen agroónerkásip baǵyty boıynsha yntymaqtastyqty kúsheıtpek
ASTANA. KAZINFORM - Eksport baǵytynda un, bıdaı, ósimdik maıy, kókónister men burshaq daqyldary, zyǵyr tuqymy, kúrish jáne Aýǵanstan naryǵynda turaqty suranysqa ıe basqa da aýyl sharýashylyǵy ónimderi jetekshi oryn alady.
QR Aýyl sharýashylyǵy mınıstrligi baspasóz qyzmetiniń habarlaýynsha, Máskeýge jumys sapary barysynda Aýyl sharýashylyǵy mınıstri Aıdarbek Saparov Aýǵanstannyń aýyl sharýashylyǵy, ırrıgatsııa jáne mal sharýashylyǵy mınıstri Mavlavı Ataýlla Omarımen jumys kezdesýin ótkizgen.
Kelissózder barysynda agroónerkásiptik keshen salasyndaǵy ekijaqty yntymaqtastyqty keńeıtý jáne birlesken jobalardy iske asyrý bolashaǵy talqylandy.
Atap ótilgendeı, 2025 jyldyń qańtar-qyrkúıek aılarynda eki el arasyndaǵy taýar aınalymy 269 mln AQSh dollaryn qurady, onyń 252,8 mln dollary Qazaqstan eksportyna tıesili.
Aıdarbek Saparov óz kezeginde áriptestikti odan ári nyǵaıtýǵa, jetkiziletin ónim túrlerin keńeıtýge jáne aýyl sharýashylyǵyn damytý salasynda tájirıbe almasýǵa daıyn ekenin jetkizdi.
Al Aýǵanstan tarapy Qazaqstannan azyq-túlik taýarlaryn jetkizýdi ulǵaıtýǵa, sondaı-aq azyq-túlik qaýipsizdigin qamtamasyz etý boıynsha birlesken bastamalardy ilgeriletýge qyzyǵýshylyq bildirdi.
Taraptar saýda-ekonomıkalyq baılanystardy kúsheıtý jáne agrarlyq saladaǵy yntymaqtastyqtyń jańa baǵyttaryn damytý boıynsha júıeli jumysty jalǵastyrýǵa ýaǵdalasty.
Osyǵan deıin Qazaqstannyń Aýǵanstan men Rýandanyń jer qoınaýyn zerttep jatqany týraly jazdyq.