Qazaqstan men Aýǵanstan túrli salalar boıynsha yntymaqtastyqty arttyrmaq
ASTANA. QazAqparat - Búgin, 3 tamyzda QR Investıtsııalar jáne damý mınıstrliginiń qoldaýymen Aýǵanstannyń ónerkásip jáne saýda mınıstri Hýmaıýn Rasav bastaǵan kásipkerler delegatsııasy Astanaǵa keldi, dep habarlady atalmysh vedomostvonyń baspasóz qyzmeti.
Іs-sharaǵa 40-tan astam isker top ókilderi qatysty, olardyń 20-dan astamy aýǵan bıznesin tanystyrdy.
Sapar barysynda Qazaqstan Respýblıkasynyń Investıtsııalar jáne damý vıtse-mınıstri Arystan Qabykenov Aýǵanstan delegatsııasymen kezdesti. Sondaı-aq Qazaqstan men Aýǵanstan kásipkerleriniń arasynda birqatar B2B kezdesýler ótti. Kezdesýge «Qazaq-Invest», «QTJ», «Qazgeologııa», «Qazaqstan-Eksport» jáne Qazaqstannyń syrtqy saýda palatasy sııaqty iri qazaqstandyq kompanııalar qatysty.
Taraptar túrli salalardaǵy saýda-ınvestıtsııalyq, aýyl sharýashylyǵy, jer jáne áýe kóligi, sondaı-aq geologııa jáne mıneraldy resýrstar sııaqty túrli salalarda Qazaqstan-Aýǵanstan qatynastarynyń qazirgi jaǵdaıy men keleshegin talqylady.
Qazaqstan Syrtqy saýda palatasynda elimizdegi orta kásipkerlik pen aýyl sharýashylyǵy, kólik jáne logıstıka sııaqty salalar boıynsha kezdesýler uıymdastyryldy.
Atalǵan is-shara eki eldiń memlekettik sektorlarynyń ókilderi men bıznes ókilderiniń qyzyǵýshylyǵyn týdyrdy. Bul kezdesýdiń nátıjesinde saýda-ekonomıkalyq qatynastar boıynsha eki jaqty yntymaqtastyq taqyrybynda pikir almasýǵa múmkindik týdy.
Konferentsııa qorytyndysy boıynsha delegatsııa basshylary kelisilgen hattamaǵa qol qoıdy. Kezdesý syndarly jáne dostyq qarym-qatynas jaǵdaıynda ótti.
Eske sala ketsek, 2018 jyldyń qańtar-sáýir aılarynda Qazaqstan men Aýǵanstan arasyndaǵy taýar aınalym 180,2 mln AQSh dollaryn qurady, bul ótken jyldyń sáıkes kezeńimen salystyrǵanda 19,3% -ǵa joǵary (151,1 mln AQSh dollary).
2005 jyldan 2018 jyldyń birinshi toqsanyna deıin Aýǵanstannan Qazaqstanǵa tikeleı ınvestıtsııalardyń jalpy aǵyny 0,2 mln AQSh dollaryn qurady.
2005 jyldan 2018 jyldyń 1-shi toqsanyna deıin Qazaqstannan Aýǵanstanǵa tikeleı ınvestıtsııalardyń jalpy aǵyny 0,3 mln AQSh dollaryna jetti.
